भोजपुर । हाल रमाइलो टिभीबाट प्रसारण भै सामाजिक बिसङ्गति बिरुद्द आवाज उठाउँदै आएको टेलिफिल्म 'मादलको खरी'ले गाउँ सहरमा चर्चा पाएसँगै भोजपुरमा भव्य सम्मान पाएको छ । भोजपुरको अरुण गाउँपाकिका ७ सिक्रेटारमा आयोजित विशेष सम्मान एवं सांस्कृतिक कार्यक्रममा लेखक/निर्देशक किशोर अनुराग सहित कलाकर ईश्वर बल्लभ उप्रेती, रोजी कुँवर, सुरत विष्ट, भीष्म आचार्य, दिनेश खड्का, रीता थापा, ज्ञानेन्द्र कोइराला, समीर राई, आशिष केसी, आइसा राइ सहित अन्य कलाकर र प्राविधिकतर्फ छायांकार/ निर्माता आनन्द प्रभाकर घिमिरे सहितको टोलीलाई सम्मानपत्रले सम्मान गरिएको थियो । साथै उनीहरुलाई अबिर र स्थानीय बालन नाचले स्वागत गरिएको थियो। जीवन थापाको संयोजकत्वमा स्थानीय सगरमाथा माविमा भएको कार्यक्रममा मादलको खरी नाटकको विशेष मञ्चन गरिएको थियो । कलाकार ईश्वर बल्लभ र रोजी कुँवरको युगल नृत्य, सुरत विष्टको क्यारिकेचर र सारङ्गी प्रस्तुति र स्थानीय कलाकारले आफ्नो कला प्रस्तुत गर्दा दर्शकले निकै मनोरञ्जन लिए । भोजपुर जिल्लाको विभिन्न स्थानमा छायांकन गरी स्थानीय कलाकार र संस्कृतिलाइ सो टेलिफिल्ममा समेट्दा भोजपुरको भौगोलिक र सांस्कृतिक गरिमा बढेको सिक्रेटारका वडाअध्यक्ष डिल्लीराम अधिकारिले बताए । भोजपुरको अरुण गाउँपालिकालाई पर्यटकीय स्थानमा परिणत गर्ने अभियानलाई 'मादलको खरी'ले झन धेरै टेवा पुर्याएको कार्यक्रमको प्रमुख अतिथी गाउँपालिका उपाध्यक्ष बिनिता ढकालले बताइन ।
