काठमाडौं । आगामी घटस्थापना (असोज २१)देखि देशभरका हलहरु खुल्ने भएका छन् । निकै लामो समयपछि खुल्न लागेको हलमा पहिलो फिल्म भने अंग्रेजी लाग्नेछ । चलचित्र संघका महासचिव अशोक शर्माले दिएको जानकारी अनुसार 'फास्ट एण्ड फ्युरियस ९' प्रदर्शन गर्दै देशभरका हल खुल्नेछन् । उनले अहिलेसम्म नेपाली फिल्महरुको प्रदर्शन टुंगो नलागेको बताए । सोभित बस्नेतको 'डाँडाको वर पिपल' फिल्म भने फूलपातीको दिनदेखी प्रदर्शनमा आउने शर्माले जानकारी दिए । स्वास्थ्य सुरक्षाका मापदण्ड अपनाएर नै हल खोल्ने शर्माको भनाइ छ । अबदेखि एउटै मितिमा हलमा दुई नेपाली फिल्म चलाउन पाइने छैन । निर्माता जोगाउनका लागि आफूहरुले हल खुलेको तीन महिनासम्म यो नियम लागू गर्नेसमेत शर्माले बताए । 'अंग्रेजी र हिन्दी फिल्ममा त्यो नियम लागू हुन्न,' शर्माले भने, ' तर नेपाली फिल्महरु एउटै मितिमा प्रदर्शन गर्न पाइने छैन । कम्तिमा २ हप्तासम्म एउटा नेपाली फिल्मलाई समय दिइनेछ । त्यसपछि मात्र अर्को फिल्म प्रदर्शनमा ल्याउन सकिन्छ ।' यसअघि उपत्यकाभित्रको हलहरु खोल्न काठमाडौं, भक्तपुर र ललितपुरका प्रमुख जिल्ला अधिकारीले निर्णय गरेको थियो । तर चलचित्र संघ नेपालभरको हल खोल्ने अनुमति नदिएको भन्दै पुन: बन्द गर्ने निर्णयमा पुगेको थियो ।
