काठमाडौं । नेपालमा अहिले मनसुनी वायु, पश्चिमी वायु र भारतको उत्तर प्रदेश आसपास विकसित न्यूनचापीय क्षेत्रको प्रभाव रहेको छ। मनसुनको न्यूनचापीय रेखा पश्चिमतर्फ सरदर स्थानको आसपास र पूर्वतर्फ सरदर स्थानभन्दा दक्षिणमा रहेको मौसम पूर्वानुमान महाशाखाले जनाएको छ।
हाल देशभर अधिकांश भूभागमा बादल लागेको छ। गण्डकी, लुम्बिनी र सुदूरपश्चिमका धेरै स्थानमा तथा बागमती र कर्णालीका केही स्थानमा वर्षा भइरहेको छ। कोशी र मधेसका थोरै स्थानमा पनि हल्का देखि मध्यम वर्षा भइरहेको छ।
महाशाखाका अनुसार आइतबार दिउँसो गण्डकी, लुम्बिनी, कर्णाली र सुदूरपश्चिम प्रदेशमा अधिकांश भूभागमा बादल लाग्नेछ। कोशी र बागमतीका हिमाली तथा पहाडी क्षेत्रमा सामान्यतया बादल लाग्नेछ भने तराईका भूभागमा आंशिक बादल लाग्ने अनुमान छ।
कर्णाली र सुदूरपश्चिमका हिमाली तथा पहाडी क्षेत्रमा धेरै स्थानमा चट्याङसहित मध्यम वर्षाको सम्भावना छ। गण्डकी र लुम्बिनीका हिमाली तथा पहाडी क्षेत्रमा केही स्थानमा तथा कोशी र बागमतीका हिमाली तथा पहाडी क्षेत्रमा थोरै स्थानमा मध्यम वर्षा हुन सक्ने महाशाखाले जनाएको छ।
सुदूरपश्चिमको तराईका धेरै स्थानमा तथा लुम्बिनीको तराईका केही स्थानमा पनि चट्याङसहित मध्यम वर्षा हुनसक्नेछ। बागमती र गण्डकीका तराईका थोरै स्थान तथा कोशी र मधेसका एक–दुई स्थानमा पनि वर्षाको सम्भावना रहेको छ।
आज सुदूरपश्चिमका थोरै स्थान तथा गण्डकी, लुम्बिनी र कर्णालीका हिमाली तथा पहाडी क्षेत्रका एक–दुई स्थानमा भारी वर्षा हुनसक्ने पूर्वानुमान छ। लुम्बिनी र सुदूरपश्चिमका तराई क्षेत्रमा हावाहुरीको समेत सम्भावना रहेको छ।
राति सुदूरपश्चिमसहित कोशी, बागमती, गण्डकी, लुम्बिनी र कर्णालीका हिमाली क्षेत्रमा सामान्यतया बादल लाग्नेछ। बाँकी भूभागमा आंशिक बादल रहनेछ।
रातिको समयमा कर्णाली र सुदूरपश्चिमका हिमाली तथा पहाडी क्षेत्रका केही स्थानमा तथा कोशी, बागमती, गण्डकी र लुम्बिनीका हिमाली तथा पहाडी क्षेत्रका थोरै स्थानमा चट्याङसहित मध्यम वर्षा हुनसक्ने महाशाखाले जनाएको छ।
यसैगरी सुदूरपश्चिमको तराईका केही स्थान तथा बागमती, गण्डकी र लुम्बिनीका तराईका थोरै स्थानमा वर्षाको सम्भावना छ। कोशी र मधेसका तराई क्षेत्रमा पनि एक–दुई स्थानमा चट्याङसहित मध्यम वर्षा हुनसक्ने पूर्वानुमान गरिएको छ।
