काठमाडौं । केही दिनदेखि मुलुकका सबै ठाउँमा व्यापक गर्मी बढेको छ । मौसममा आएको परिवर्तनले कात्तिक महिना लाग्न लाग्दा समेत गर्मी बढेको हो । तर अब भोलि आइतबार देखि भने देशका धेरै ठाउँमा पानी पर्ने र सोमबारदेखि हिमाली क्षेत्रमा हिमपात सुरु हुने मौसमविद्ले बताएका छन् । भारतको आन्ध्र प्रदेश तथा ओडिसाको तटीय क्षेत्र आसपास रहेको न्यूनचापीय प्रणाली र विकसित हुँदै गरेको पश्चिमी वायु प्रणालीको संयुक्त प्रभावले नेपालमा आंशिकदेखि सामान्य बद्ली हुने मौसमविद् गंगा नगरकोटीले बताइन । देशभरको मौसम आंशिकदेखि सामान्य बद्ली रहने भएकाले हुस्सु लाग्ने, पानी पर्ने, मेघगर्जनसहित चट्याङ्ग पर्ने जस्ता गतिविधि हुने उनले बताइन । मौसम बद्ली भएसँगै गर्मी कम हुँदै जानेछ । आज काठमाण्डाैको अधिकतम तापक्रम ३१ दशमलव ८ डिग्री सेल्सियस रहेको छ । सबै भन्दा धेरै तापक्रम विराटनगरमा रहेको छ । विराटनगरको अधिकतम तापक्रम ३६ दशमलव ५ डिग्री सेल्सियस मापन गरिएको छ ।