काठमाडौं । कोभिड–१९ को सङ्क्रमणको जोखिम कायमै रहेकाले सर्वसाधारणलाई अत्यावश्यक कामबाहेक बाहिर ननिस्कन विज्ञले सुझाएका छन् । छिमेकीमूलुक भारतमा समुदायस्तरमा सङ्क्रमण फैलिएको र नेपालमा पनि लकडाउन खुलेकाले सङ्क्रमणको जोखिम कायमै रहेको भन्दै सर्वसाधरणलाई घर बाहिर ननिस्कन विज्ञहरुले आग्रह गरेका हुन् । स्वास्थ्य तथा जनसङ्ख्या मन्त्रालयका सहप्रवक्ता डा समिरकुमार अधिकारीले लकडाउन खुलेसँगै सङ्क्रमणको जोखिम बढेको भन्दै झन् सतर्क हुनुपर्ने बताए ।
‘सङ्क्रमणको जोखिम झन् बढेको छ, सकभर कोही पनि बाहिर डिडुल गर्नु हुदैन’, उनले भने, ‘निस्कन परे मास्क लगाउने, सेनिटाइजर साथमै बोकेर लगाउन र भौतिक दुरी कायम गर्नुपर्छ, अझ सकिन्छ भने समय समयमा साबुन पानीले हात पनि धुनुपर्छ ।’
कोरोनाको संक्रमण बढ्न नदिन सरकारले चैत ११ गते गरेको लकडाउन यही साउन ७ गतेदेखि अन्त्य गरेको छ । लकडाउन खुलेसँगै उपत्यकामा सवारी साधन सञ्चालन भएका छन् भने मानिसको समेत भीडभाड बढेको छ ।
डा अधिकारीले भारतसँग सिमाना जोडिएका क्षेत्रमा सङ्क्रमित बढ्नु, भारतबाट अझै मानिसहरु नेपाल भित्रिरहेकाले जोखिम नघटेको बताए ।
‘अब सङ्क्रमण हुँदैन भनेर ढुक्क हुनुहुँदैन, साथीभाईलाई पनि सङ्क्रमण हुनसक्दछ, त्यसैले भौतिक दुरी कायम गरौं । भारत लगायतका देशबाट भित्रिने संख्या बढेको छ सजग रहनुपर्छ,’ डा. अधिकारीले थपे ।
शुक्रराज ट्रपिकल तथा सरुवा रोग अस्पतालका कार्यकारी निर्देशक डा. सागरराज भण्डारीले पनि उपत्यकामा भीडभाड बढेकाले सङ्क्रमणको जोखिम रहेको बताए । उनले उपत्यकामा विदेशबाट आउने र लकडाउनमा बाहिर गएका मानिस पनि भित्रिन थालेकोले सङ्क्रमण बढ्ने खतरा रहेको बताए ।
