झापा । भुमिपुत्र किरातीहरुको महान चाड साकेला उभौलीको अवसरमा झापा बिर्तामोड नगरपालिका वडा नं. १० स्थित कालिमुनी जहरमान टोलका स्थानीयले उक्त पर्व मनाएका छन् । सो टोलका सुनुवार समुदायले महान चाड श्याँदर पिदार (उभौली) ५०८३, भब्य रुपमा मनाएका हुन् ।
पर्वको अवसरमा एकापसमा शुभकामना आदानप्रदान साटासाट गरिएको समाजसेवी तथा सुनुवार समाज बिर्तामोड १० झापाका अध्यक्ष मनु मुखियाले बताए । उनका अनुसार विश्व शान्तिको कामनासहित यो पर्व मनाइन्छ ।
यसवाहेक बालीनाली राम्रो उब्जनी होस भनी भुमिलाई पुजिएको चन्डिका मुख्य पुजारी (मुल नासो) कुबेर धन मुखियाले बताए । उनका अनुसार उभौली किराँतहरू सुनुवार, राई, लिम्बु र याक्खा जातिको महान चाड हो ।
उभौली पर्वको रूपमा रहेको किरातीहरूको यो महत्त्वपूर्ण चाड वसन्त ऋतुमा वालीनाली राम्रो होस् सबैमा सुख शान्ति सूस्वास्थ्य रहोस् र दैविप्रकोप तथा विपक्तिहरू नआउन् भनि पुजा गरिन्छ ।
यस चाडमा सुनुवार र राईहरू साकेलारसखेवा शिली नाच्छन भने लिम्बु र याख्खाहरू च्याब्रुङ नाच नाच्दै प्रकृतिलाई पुजा गर्दछन । किराँतीहरूको यो पर्व पृथ्वीमा कृषियुग शुरु भएदेखि प्रचलनमा आएको विश्वास गरिन्छ ।
