ललितपुर । ललितपुरको सानागाउँमा ट्यांकरको ठक्करबाट स्कुटर चालकको मृत्यु भएको छ ।
महालक्ष्मी नगरपालिका वडा नम्बर ६ सानोगाउँमा सोमबार बिहान बा ३ ख ८५८५ नम्बरको ट्यांकरले बागमती प्रदेश ०२ – ०३४ प ७३२८ नम्बरको स्कुटरलाई ठक्कर दिँदा १७ वर्षीया सुहन राईको मृत्यु भएको जिल्ला प्रहरी परिसर ललितपुरका प्रवक्ता, एसपी नरेशराज सुवेदीले बताए । मृतक राई स्कुटर चालक रहेको एसपी सुवेदीले जानकारी दिए । उनी ललितपुरको बालकुमारीस्थित माइलस्टोन कलेजका कक्षा ११ का विद्यार्थी हुन् ।
उनकाअनुसार स्कुटर चालक राईलाई दुर्घटनालगत्तै इमाडोलस्थित किष्ट हस्पिटलमा पु-याइएको थियो । उनलाई चिकित्सकले मृत घोषणा गरेको सुवेदीले बताए ।
मृतक राई महालक्ष्मी नगरपालिका, वडा नं. ८ शंखादेवीबाट बालकुमारीस्थित माइलस्टोन कलेज जाँदै गरेको सुवेदीले बताए ।
उनको शव अहिले किष्ट अस्पतालमै राखिएको छ । ठक्कर दिने ट्यांकर र चालकलाई नियन्त्रणमा लिइएको छ । चालक कमल केसी महालक्ष्मी – ५ टिकाथलीका हुन् ।
