काठमाडौं । मुलुकका धेरैजसो भूभागमा मनसुन सक्रिय बनेसँगै आइतबारसम्म देशभर वर्षा प्रणाली फैलिने भएको जल तथा मौसम विज्ञान विभागले जनाएको छ । विभागले भारी वर्षाको सम्भावना रहेकाले आम नागरिकदेखि सरकार र सरोकारवाला निकायहरूलाई उच्च सतर्क रहन अनुरोध गरेको छ ।
शुक्रबार रातिदेखि सुरु भएको वर्षा शनिबार दिनभर निरन्तर जारी रह्यो । विशेषगरी मधेश, बागमती र गण्डकी प्रदेशका विभिन्न स्थानमा भारी वर्षा रेकर्ड भएको विभागको मौसम पूर्वानुमान महाशाखा र जलवायु विश्लेषण शाखाले जानकारी दिएको छ ।
विभागका महानिर्देशक कमलराम जोशीका अनुसार बङ्गालको खाडीमा विकसित मनसुनी न्यूनचापीय प्रणाली हाल नेपालभर फैलिएको छ । “शनिबार राति १० बजेदेखि आइतबार बिहान २ बजेसम्म अत्यधिक वर्षा हुने सम्भावना छ,” उनले बताए, “त्यसैले सबैले जिउधनको सुरक्षामा विशेष ध्यान दिनुपर्छ ।”
उनका अनुसार बागमती, मधेश, गण्डकी र लुम्बिनी प्रदेशका अधिकांश क्षेत्रमा थप भारी वर्षा हुने सम्भावना उच्च छ । नदी, खोलानाला र तटीय क्षेत्रमा डुबान तथा सहरी क्षेत्रमा जलमग्नता हुन सक्ने जोखिम रहेकाले नागरिकलाई सतर्क रहन अनुरोध गरिएको छ ।
विभागले असोज १५ गते नै एक विज्ञप्ति जारी गर्दै टीकाको भोलिपल्टदेखि मनसुन पुनः सक्रिय हुने चेतावनी दिएको थियो । वर्षा गराउने प्रणाली पूर्व–उत्तरबाट देशभर फैलिँदै आइतबार दिउँसोपछि क्रमशः कमजोर हुँदै जाने अनुमान गरिएको छ ।
मौसम पूर्वानुमान महाशाखाका अनुसार विगत २४ घण्टामा मधेशका १२ स्थानमा अत्यधिक वर्षा रेकर्ड गरिएको छ । रौतहटको महेशपुरमा ३४८ मिलिमिटर वर्षा रेकर्ड भएको छ, जुन हालसम्मको सबैभन्दा बढी हो । त्यसैगरी गौरमा ३२७, गरुडामा २७६, वीरगन्जमा २८५, पोखरियामा २३३, कलैयामा २५५, परवानीपुरमा २०६, निजगढमा १९१, र जितपुरमा १८६ मिलिमिटर वर्षा मापन गरिएको छ । विभागले रातभर यो आँकडा अझ बढ्न सक्ने जनाएको छ ।
आइतबार दिउँसोसम्म कोशी, मधेश, बागमती र गण्डकी प्रदेशका पहाडी र तराईका धेरै स्थानमा भारी वर्षा जारी रहने सम्भावना रहेको महाशाखाले जनाएको छ । मौसमविद् प्रतिभा मानन्धरका अनुसार लगातारको वर्षाले माटो कमजोर भइसकेकाले सानो वर्षाले पनि पहिरो र भेलबाढीको जोखिम बढ्न सक्छ ।
विभागले रातिको समयमा विशेष सतर्कता अपनाउन र जोखिमयुक्त स्थानमा बसोबास नगर्न सबैलाई आग्रह गरेको छ ।
