काठमाडौँ । लामो समयदेखि पत्रकारितामा सक्रिय रहँदै आएका चर्चित सञ्चारकर्मी ऋषि धमलाले प्रतिनिधिसभा निर्वाचनमा उम्मेदवारी दिने घोषणा गरेका छन् । उनले रौतहट जिल्ला निर्वाचन क्षेत्र नम्बर ४ बाट उम्मेदवारी दिन लागेका हुन् ।
धमलाले आम जनता पार्टीको तर्फबाट आगामी प्रतिनिधिसभा निर्वाचनमा भाग लिन लागेको जानकारी उनकी पत्नी एलिजा गौतमले सार्वजनिक गरेकी छन् । गौतमले सामाजिक सञ्जाल फेसबुकमार्फत एक तस्बिर सार्वजनिक गर्दै धमलाले मोबाइल चुनाव चिन्ह लिएर उम्मेदवारी दिन लागेको उल्लेख गरेकी हुन् ।
पत्रकारिताको क्षेत्रमा लामो अनुभव बटुलेका धमला पछिल्लो समय सामाजिक तथा राजनीतिक विषयमा खुला बहस र प्रश्नोत्तर (जनता जान्न चाहन्भछन्) मार्फत परिचित नाम हुन् । टेलिभिजन कार्यक्रममार्फत आम जनताको आवाज उठाउँदै आएका उनले अब प्रत्यक्ष राजनीतिक मैदानमा उत्रिने निर्णय गरेका हुन् ।
रौतहट–४ बाट उम्मेदवारी दिने निर्णयसँगै धमलाले जनतासँग प्रत्यक्ष सम्पर्कमा रहेर काम गर्ने प्रतिबद्धता व्यक्त गर्दै आएका छन् । उनले पत्रकारितामा रहँदा देखेका समस्या, सुनेका गुनासा र अनुभूत गरेका जनभावनालाई अब संसद्मार्फत सम्बोधन गर्ने उद्देश्य राखेको बताइन्छ ।
आम जनता पार्टीले यसपटक वैकल्पिक राजनीतिक धार प्रस्तुत गर्ने रणनीतिअनुसार विभिन्न क्षेत्रमा नयाँ अनुहारलाई उम्मेदवार बनाउने तयारी गरिरहेको छ । सोही क्रममा धमलालाई रौतहट–४ बाट उम्मेदवार बनाइएको पार्टी स्रोतको भनाइ छ ।
धमलाको उम्मेदवारी घोषणासँगै रौतहट–४ को राजनीतिक समीकरण थप रोचक बन्ने देखिएको छ । पत्रकारिताबाट राजनीतिमा प्रवेश गरेका धमलाले कस्तो जनसमर्थन प्राप्त गर्छन् भन्ने विषयलाई धेरैले चासोका साथ हेरेका छन् ।
प्रतिनिधिसभा निर्वाचन नजिकिँदै गर्दा धमलाले चाँडै नै चुनावी कार्यक्रम र प्रतिबद्धतापत्र सार्वजनिक गर्ने तयारी गरेको जनाइएको छ ।
