काठमाडौं । आगामी प्रतिनिधिसभा निर्वाचन नजिकिँदै गर्दा ललितपुर निर्वाचन क्षेत्र नं. १ मा चुनावी सरगर्मी बढ्दै गएको छ । मुख्य राजनीतिक दलहरूले आ–आफ्ना उम्मेदवार टुंग्याइसकेका छन् भने नयाँ र साना दलहरू पनि मैदानमा उत्रिँदा यस क्षेत्रको प्रतिस्पर्धा चासोको विषय बनेको छ ।
२०७९ सालको निर्वाचनमा नेपाली कांग्रेसका उदयशमशेर राणाले नेकपा (एमाले) का उम्मेदवार नवराज सिलवाललाई पराजित गर्दै प्रतिनिधिसभा सदस्यमा निर्वाचित भएका थिए । यसपटक पनि राणाले पुनः उम्मेदवारी पाउँदा एमालेले भने नयाँ अनुहार अघि सारेको छ ।
कांग्रेसको भरोसा फेरि राणामाथि
नेपाली कांग्रेसले भर्खरै सम्पन्न विशेष महाधिवेशनबाट उपमहामन्त्रीमा निर्वाचित उदयशमशेर राणालाई यसपटक पनि ललितपुर–१ बाट उम्मेदवार बनाएको छ । उनी लगातार चौथोपटक यस क्षेत्रबाट चुनावी मैदानमा उत्रिएका हुन् ।
२०७९ सालको निर्वाचनमा नेकपा (माओवादी केन्द्र) र माधवकुमार नेपाल नेतृत्वको एकीकृत समाजवादीसहितको गठबन्धनको समर्थनमा राणाले २३ हजार ८९२ मत प्राप्त गरेका थिए । उनका प्रतिस्पर्धी एमाले उम्मेदवार नवराज सिलवालले १९ हजार २७८ मत पाएका थिए ।
राणा यसअघि यही क्षेत्रबाट दुईपटक विजयी भएका छन् भने दुईपटक पराजय बेहोरेका छन् । कांग्रेसभित्र अनुभवी र संगठनात्मक रूपमा बलियो उम्मेदवारका रूपमा उनलाई हेरिएको छ ।
एमालेबाट संजेल
नेकपा (एमाले) ले यसपटक उम्मेदवार परिवर्तन गर्दै चेतनाथ संजेललाई ललितपुर–१ बाट अघि सारेको छ । संजेल २०७४ सालको निर्वाचनमा ललितपुर क्षेत्र नं. १ (ख) बाट वाग्मती प्रदेशसभा सदस्य निर्वाचित भएका थिए ।
तर २०७९ सालको प्रदेशसभा निर्वाचनमा उनी नेपाली कांग्रेसका मीनकृष्ण महर्जनसँग पराजित भएका थिए । उक्त निर्वाचनमा मीनकृष्ण महर्जनले १३ हजार ३७८ मत ल्याउँदा संजेलले नौ हजार १६४ मतमा चित्त बुझाउनुपरेको थियो । एमालेले यसपटक संगठन विस्तार र मताधार मजबुत बनाउँदै कांग्रेसलाई चुनौती दिने रणनीति बनाएको देखिन्छ ।
रास्वपाबाट बुद्धरत्न महर्जन, स्थानीय असन्तुष्टि
राष्ट्रिय स्वतन्त्र पार्टी (रास्वपा) ले बुद्धरत्न महर्जनलाई ललितपुर–१ बाट उम्मेदवार बनाएको छ । उनी मूलतः ललितपुर निर्वाचन क्षेत्र नं. २ का स्थानीय हुन् ।
क्षेत्र नं. २ मा पूर्वसञ्चारमन्त्री जगदीश खरेलले टिकट पाएपछि महर्जनलाई क्षेत्र नं. १ मा उम्मेदवार बनाइएको बताइन्छ । यही कारण क्षेत्र नं. १ मा उनको उम्मेदवारीप्रति असन्तुष्टि र विरोधसमेत देखिएको जनाइएको छ । यसअघि सुरेन्द्र बजगाईं रास्वपाबाट उम्मेदवार बन्ने चर्चा चलेको थियो ।
२०७९ सालको निर्वाचनमा रास्वपाले सचिनकुमार घिमिरेलाई उम्मेदवार बनाएको थियो । घिमिरेले उक्त चुनावमा तीन हजार २७७ मत प्राप्त गरेका थिए ।
नेकपाबाट महर्जन
नेपाली कम्युनिस्ट पार्टी (नेकपा) ले सुनील महर्जनलाई ललितपुर–१ बाट उम्मेदवार बनाएको छ । उनी पूर्वमाओवादी पृष्ठभूमिका नेता भने होइनन् । पार्टी एकीकरणपछि उनी नेकपामा आबद्ध भएका हुन् । महर्जनले टिकट पाएसँगै पार्टीभित्रका पूर्वमाओवादी पृष्ठभूमिका नेताहरू असन्तुष्ट बनेका छन् । उनी धेरै चर्चित राजनीतिक व्यक्तित्व नभएकाले चुनावी प्रभाव कति पर्ने भन्नेमा समेत प्रश्न उठिरहेका छन् ।
राप्रपा र अन्य दलको पनि उपस्थिति
राष्ट्रिय प्रजातन्त्र पार्टी (राप्रपा) ले ललितपुर निर्वाचन क्षेत्र नं. १ बाट सजिना कार्कीलाई उम्मेदवार तय गरेको छ । त्यस्तै, नागरिक पहिलो पार्टीबाट लेलेका सनोज महर्जन उम्मेदवार बन्ने भएका छन् । उज्यालो नेपालबाट राजु आले मगरले टिकट पाए उम्मेदवारी दिने बताएका छन् ।
कसिलो प्रतिस्पर्धाको संकेत
मुख्य दलहरूको बलियो उपस्थिति, नयाँ दलको वैकल्पिक दाबी र साना दलहरूको सहभागिताले ललितपुर निर्वाचन क्षेत्र नं. १ मा यसपटकको चुनाव प्रतिस्पर्धात्मक बन्ने देखिएको छ । अब मतदाताको निर्णयले कसको राजनीतिक पकड बलियो छ भन्ने स्पष्ट गर्नेछ ।
