ललितपुर । ललितपुरको बज्रबाराहीस्थित बज्रबाराही चापागाउँ अस्पतालमा विपद् पूर्वतयारीका लागि ड्रिल अभ्यास बैठक सम्पन्न भएको छ । गोदावरी नगरपालिकाका नगर प्रमुख गजेन्द्र महर्जनको प्रमुख आतिथ्यतामा आइतबार बैठक सम्पन्न भएको हो ।
कार्यक्रममा बोल्दै नगर प्रमुख महर्जनले नेपालमा प्राकृतिक विपत्ति आएपछि मात्र उद्धार कार्य सुरु हुने प्रवृत्ति रहेको उल्लेख गर्दै पूर्वतयारीका रूपमा यस्तो अभ्यास आयोजना गरिएकोमा खुसी व्यक्त गरे । यस्ता ड्रिल अभ्यासले बाढी, पहिरो, आगलागी, भूकम्पजस्ता विपद्का समयमा सुरक्षित रहने उपायबारे जानकारी दिने उनले बताए । उनले बज्रबाराही अस्पताल दक्षिण ललितपुरका तीनवटा गाउँपालिकाको प्रमुख उपचार केन्द्र भएको स्मरण गराउँदै प्राकृतिक विपत्ति पूर्वसूचना बिना आउने भएकाले सबैले सावधानी अपनाउनुपर्नेमा जोड दिए । उनले अस्पतालमा पछिल्लो समय रेविज खोपको अभाव रहेको उल्लेख गर्दै समस्या समाधानका लागि पहल गर्न सुझाव दिए । आर्थिक अभाव भए नगरपालिका सहयोग गर्न तयार रहेको उनको भनाइ थियो ।
अस्पतालका मेडिकल सुपरिन्टेन्डेन्ट डा. लक्ष्मण खड्काले हाल नयाँ भवन निर्माणाधीन रहेकाले साँघुरो स्थानबाट सेवा दिनुपरेको जानकारी दिए । यसपटकको अभ्यासमा बाढी तथा पहिरोसम्बन्धी कृत्रिम घटना प्रस्तुत गरिने उनले बताए । उनका अनुसार उक्त अभ्यासमार्फत घाइतेको उद्धार प्रक्रिया, स्वास्थ्यकर्मीको परिचालन तथा उपचार व्यवस्थापनसम्बन्धी विषयमा अभ्यास गराइनेछ । इमर्जेन्सी कक्षमा बिरामीको अवस्थाअनुसार छुट्टाछुट्टै जोन निर्धारण गरी उपचार गर्ने व्यवस्था रहेको उनले जानकारी दिए । डा. खड्काले यस्ता अभ्यासले ठूला दुर्घटना तथा विपद्का समयमा नआत्तिई काम गर्न सहयोग पुग्ने र अभ्यासका क्रममा देखिएका कमजोरी सुधार गर्दै लैजान सकिने बताए । ड्रिल अभ्यास प्रभावकारी बनाउन नेपाली सेना, नेपाल प्रहरी, सशस्त्र प्रहरी तथा नेपाल रेडक्रसको सहकार्य आवश्यक रहेको पनि उनले उल्लेख गरे ।
पाटन अस्पताल, लगनखेलका डा. कृपा महर्जनले ‘डिजास्टर प्लान’ को महत्वबारे प्रकाश पार्दै विपद्का बेला कसले के गर्ने भन्ने स्पष्ट हुनुपर्ने बताइन् । उनले विपद् अघि र पछि सञ्चार माध्यमको महत्वपूर्ण भूमिका रहने उल्लेख गरिन् ।
जनस्वास्थ्य कार्यालयका ल्याब टेक्निसियन श्रीभद्रा शर्माले विपद्का समयमा जनस्वास्थ्य कार्यालय अस्पताललाई आवश्यक सहयोग गर्न सधैँ तत्पर रहने प्रतिबद्धता व्यक्त गरे ।
बज्रबाराही अस्पतालका फोकल पर्सन डा. अमरदीप साहले अस्पताल २५ शय्याको रहेको र इमर्जेन्सी कक्षमा ५ बेड रहेको जानकारी दिए । अस्पतालबाट बहिरङ्ग, शल्यक्रिया, रेडियोलोजीलगायत सेवा प्रवाह भइरहेको उनले बताए ।