ललितपुर, माघ ५ । ललितपुर प्रहरीले ९ लाख ७ हजार ८४ नगद सहित ११ जना जुवाडेलाई पक्राउ गरेको छ । गोदावरी नगरपालिका वडा नं. १३ झरुवारासीमा रहेको एक घरमा हारजित हुने गरी जुवातासको अखडा बनाइ जुवा खेलिरहेको अबस्थामा महानगरीय प्रहरी वृत्त चापागाउँका डिएसपी कृष्णराज ओझा र प्रहरी निरीक्षक राजेन्द्र थापा नेतृत्व टोलीले ११ जनालाई नगदसहित प्रकाउ गरेको हो ।
ओझा १ महिना अगाडि मात्र चापागाउँ वृत्तको नेतृत्व सम्हालेका डिएसपी हुन् । पक्राउ पर्नेमा गोदावरी नगरपालिका वडा नं. १२ का सानुकान्छा महर्जन, वडा नं. १३ का नितेश थापा, नविन रावल, कुमार लामा, मिलन केसी, पवन खड्का र वडा नं. १४ का रुपेश महर्जन, कृष्ण महर्जन, राजेश महर्जन, आशिष महर्जन, निराजन महर्जन रहेको डिएसपी ओझाले जानकारी दिए ।
तास खेलिरहेको भन्ने खबर प्राप्त हुनासाथ वृत्त चापागाउँबाट खटिएको प्रहरीले उनीहरूलाई नगद ९ लाख ७८४ रुपैयाँ र ३ बुक तास सहित पक्राउ गरेको हो । पक्राउ परेकाहरुलाई तास, जुवा ऐनअन्तर्गत कारबाही हुने प्रहरीले जनाएको छ ।
