ललितपुर । ललितपुरका थप ११ जनामा कोरोना संक्रमण पुष्टि भएको छ । थपिएका सबै ललितपुर महानगरपालिकामा बसोबास गर्ने हुन् । आइतबार दिउँसो स्वास्थ्य तथा जनसंख्या मन्त्रालयले गरेको नियमित पत्रकार सम्मेलनमा जिल्लामा पछिल्लो २४ घण्टामा ३८ संक्रमित रहेको जनाएको थियो ।
जिल्ला स्वास्थ्य कार्यालयले केहीबेरअघि अद्यावधिक गरेको रिपोर्ट अनुसार जिल्लामा कोरानाबाट थप ११ जना संक्रमित थपिएका हुन् ।
नयाँ थप भएको संख्यामा १ वर्षदेखि ८० वर्षसम्मका बृद्धा रहेका छन् । नयाँ संक्रमितमा ३ जना बाहेक ललितपुर महानगरपालिकामा अस्थायी बसोबास गर्ने रहेको स्वास्थ्य कार्यालय स्रोतले जनाएको छ । सरकारले साउन ७ गतेदेखि देशव्यापी गरेको लकडाउन खुला गरेसँगै ललितपुर महानगरपालिकामा संक्रमितको संख्या बढ्दै गएको छ । आइतबार ११जना नयाँ थप भएसँगै ललितपुरमा कोरोना संक्रमितको संख्या २ सय ७५ पुगेको छ ।
