काठमाडौं । सरकारले तेजाब (एसिड) आक्रमण रोक्न कडा कानुन समेटिएको अध्यादेश जारी गर्ने भएको छ । तेजाब आक्रमणविरूद्ध फौजदारी अपराध संहिता ऐन संशोधनसम्बन्धी र बिक्री वितरण नियमनसम्बन्धी दुईवटा अध्यादेश बिहीबारको मन्त्रिपरिषद् बैठकमा पेस भएको र मन्त्रीहरूलाई राय सुझाव दिन शुक्रबार १२ बजेसम्मको समय दिइएको छ । अध्यादेश शुक्रबार नै राष्ट्रपति कार्यालय पठाइनेछ ।
नयाँ कानुनअनुसार तेजाबसम्बन्धी कसुरमा २० वर्षसम्मको सजाय निर्धारण गरिएको छ । यस्तै दश लाखसम्म जरिबाना तोकिएको छ । आक्रमणकारीको सम्पत्ति रोक्का गरेर पीडितलाई तुरुन्तै क्षतिपूर्ति भराइने पनि नयाँ कानुनमा व्यवस्था गरिएको छ ।
तेजाब छ्यापेर पीडितको अनुहार, आँखा, नाक, कान, घाँटी तथा संवेदनशील अङ्गमा क्षति पु¥याइएमा २० वर्षसम्म कैद सजाय निर्धारण गरिएको छ । शरीरका अन्य अङ्गमा तेजाब मात्रै परे १० वर्ष सजाय भुक्तान गर्नुपर्ने छ ।
२० वर्ष कैद सजायको हकमा एकदिन पनि सजाय छुट नहुने र पूरै अवधि जेल बस्नुपर्ने प्रावधान राखिएको कानुनमन्त्री तुम्बाहाङ्फेले जानकारी दिइन् । तेजाब बिक्रीमा पनि सरकारले कडाइ गर्ने भएको छ । जिल्ला प्रशासन कार्यालयबाट लाइसेन्स लिएर मात्र बिक्री वितरण गर्न पाइने र वर्षैपिच्छे लाइसेन्स, बिक्री इजाजत अद्यावधिक, नवीकरण गर्नुपर्ने नयाँ कानुनमा व्यवस्था छ ।
प्रधानमन्त्रीले अपराध नियन्त्रण गर्न पीडितलाई न्याय दिलाउन गत भदौ २५ गते यसअघि विभिन्न तेजाब आक्रमणका घटनामा परेका झण्डै १२ जनासँग परामर्श गरेर नयाँ कानुन ल्याउने प्रतिवद्धता जनाएका थिए ।
