ललितपुर । ललितपुरको कुमारीपाटीमा सञ्चालित गुडविल बचत तथा ऋण सहकारी संस्था लिमिटेडका सञ्चालक बचतकर्ताको रकम नदिएर सम्पर्कविहीन भएका छन् ।
महिनौंदेखि बचतकर्ताले सो सहकारीसँग बचत रकम माग गर्दै आएकोमा भोलि/भोलि भन्दै टार्दै आएका सञ्चालक सम्पर्कविहीन भएपछि बचतकर्ताहरु आक्रोशित भएका छन् । दिनहुँ जसो ठूलो संख्यामा बचतकर्ता सहकारीमा रकम झिक्न गए पनि रकम नपाएर पछि उनीहरू निराश र आक्रोशित भएर फर्किने गरेका छन् ।
सयौं संख्यामा आज बचतकर्ताहरु संस्थाको कार्यालयमा आएका थिए, तर सञ्चालकहरु नभेटिएपछि निराश हुँदै उजुरी दिन भन्दै महानगरीय प्रहरी परिसर, ललितपुर गएका थिए । संस्थाका बचतकर्ता श्याम राई पटक पटक सहकारी कार्यालय धाउदा पनि आफूले बचत गरेको रकम सहकारीले फिर्ता नगरेको दैनिकीन्युजसँग दुखेसो पोखे ।
आफूहरूको बचत गरेको रकम डुबाएर सञ्चालक फरार भएको भन्दै बचतकर्ताहरुले सो सहकारी संस्थाविरुद्ध प्रहरी परीसर ललितपुरमा उजुरी समेत दिएका छन् ।
परीसर ललितपुरका प्रवक्ता प्रज्वल महर्जनले सो संस्थाविरुद्ध सोमबार उजुरी परेको स्वीकारे । संस्था विरुद्ध सहकारी विभागमा समेत उजुरी दिन बचतकर्ताहरुलाई सुझाब दिएको बताए ।
जिल्ला बचत संघका अध्यक्ष रामहरि बजगाईले संस्थाका अध्यक्ष र सचिवलाई बोलाएर समस्या हल गर्न सुझाव दिएको बताए । उनले भने, ‘जनताको पैसा डुब्न हुँदैन, यसमा हामी पनि सचेत छौं ।’ पछि संस्थाको कोही पनि व्यक्ति हाम्रो सम्पर्कमा नआएको बजगाईले बताए । गलत गर्नेलाई कानूनको दायरामा ल्याउनु पर्ने बजगाईको भनाइ छ ।
