सुनसरी । नेपाली कांग्रेसका सभापति शेरबहादुर देउवाले केपी शर्मा ओली नेतृत्वको सरकारसँग बहुमत भएकाले कांग्रेसले चाहदैमा नयाँ सरकार गठन नहुने बताएका छन् । उनले सर्वोच्च अदालतको आदेशपछि एमाले र माओवादी केन्द्रमा विभाजित भए पनि पुष्पकमल दाहालले सरकारको समर्थन फिर्ता नलिएकोले बहुमतको संयुक्त सरकार नै भएको बताए । मंगलबार धरानमा भएको कार्यक्रममा बोल्दै देउवाले सरकार बनाउन निकै सोच्नुपर्ने बताए । ‘अहिले एउटा पार्टी सरकारमा छ, त्यसलाई प्रचण्डजीको पार्टीले समर्थन गरेको छ,' देउवाले भने,' त्यसैले यो संयुक्त सरकार हो । संयुक्त सरकार भएकाले बहुमतको सरकार भयो । बहुमतको सरकार हुँदाहुँदै कांग्रेसले चाहदैमा नयाँ सरकार गठन हुँदैन ।’ माओवादी पनि सरकारमै सामेल भएकाले कांग्रेसलाई सरकार ढाल्ने र बनाउने हतारो नभएको र अहिले सरकारमा जान बल नगर्ने उनले प्रष्ट पारे । ‘तर परि आए छाड्दैन पनि,’ उनले भने । ओलीको बहुमतको सरकार रहेसम्म कांग्रेसले प्रतिपक्षीको भूमिकामा बसेर मुलुकभर संगठन विस्तार गर्दै जाने देउवाले योजना सुनाए ।
मंगलबार नै विराटनगरमा देउवाले सरकार नबनाउने र प्रधानमन्त्री ओलीविरुद्ध अविश्वासको प्रस्ताव पनि नल्याउने बताएका थिए । ‘कांग्रेसले सरकार बनाउँदैन,’ उनले भने, ‘विपक्षी पार्टी सरकारमा जाने कुरो हुँदैन । ‘कांग्रेस विपक्षी पार्टी हो, विपक्षमै रहन्छ ।’
