सिन्धुली । शुक्रबार मोटरसाइकल दुर्घटना हुँदा सिन्धुलीमा एकै परिवारका तीन जनाको मृत्यु भएको छ । सिन्धुलीको कमलामाई नगरपालिका–१४ चन्दनपुरमा बेलुका सो मोटरसाइकल दुर्घटना हुँदा एकै परिवारका तीन जनाको मृत्यु भएको प्रहरीले जनाएको छ । प्रहरीकाअनुसार दुर्घटनामा दुधौली नगरपालिका–४ डकाहाका २६ वर्षीय यमकुमर (दनुवार) र उनका भतिजहरु १३ वर्षीय आशीष कुमर र ९ वर्षीय अदितकुमरको मृत्यु भएको हो । उनीहरुमध्ये दुई जनाको घटनास्थलमै र अदितको सिन्धुली अस्पतालमा उपचारका लागि लैजाँदै गर्दा मृत्यु भएको सिन्धुली प्रहरी कार्यालयका डीएसपी मनोजकुमार लामाले बताए । कमलामाई नगरपालिका ९ को भिमानबाट डकाहातर्फ जाँदै गरेको प्रदेश २–००१ प २१६३ नम्बरको मोटरसाइकल अनियन्त्रित भई दुर्घटना भएको प्रहरीले जनाएको छ । मृतक यमकुमर जिल्ला प्रहरी कार्यालय सर्लाहीमा प्रहरी जवानमा कार्यरत रहेको पनि जनाइएको छ ।