काठमाडौं । नेपाली काङ्ग्रेसमा सभापति शेरबहादुर देउवालाई आगामी महाधिवेशनमा हराउने गरी गठबन्धन बनाउने तयारी भएको छ । त्यसका लागि सभापतिको उम्मेदवार एउटै बनाउन देउवाबाहेक संस्थापनइतर खेमा लागेका छन् । कांग्रेस नेता अर्जुननरसिंह केसीको संयोजनमा शुक्रबार उम्मेदवारका आकांक्षीसहित संस्थापनइतर पक्षको बैठक बसेको थियो ।
सभापति शेरबहादुर देउवासँग प्रतिस्पर्धा गर्न एक जनाले मात्रै उम्मेदवार दिनुपर्नेमा आकांक्षीहरूबीच सहमति भए पनि कसले कसलाई छाड्ने भन्नेमा समझदारी हुन सकेको छैन । इतर पक्षबाट वरिष्ठ नेता रामचन्द्र पौडेल, महामन्त्री शशांक कोइराला, नेताहरू प्रकाशशरण महत, कृष्णप्रसाद सिटौला र शेखर कोइराला आकांक्षी देखिएका छन् । नेता केसीले समझदारी जुटाउन प्रारम्भिक छलफल भएको बताए । ‘एक मात्रै उम्मेदवार हुनुपर्छ भन्नेमा आकांक्षीबीच सैद्धान्तिक समझदारी बने पनि कसले कसलाई छाड्ने, कुन मोडालिटी र आधारमा समझदारी गर्ने भन्नेबारेमा प्रारम्भिक छलफल मात्रै भएको छ,’ उनले भने, ‘जिल्ला सभापतिलगायत प्रतिनिधि साथीहरूको सल्लाहअनुसार हामी एउटै उम्मेदवार उठाउने प्रयत्न गर्छौं ।’ संस्थापन पक्षबाट सभापति देउवा, उपसभापति विमलेन्द्र निधि र संगठन विभाग प्रमुख गोपालमान श्रेष्ठले सभापतिमा दाबी गरेका छन् ।
