धनुषा । नेपाली कांग्रेस प्रदेश २ सभापतिमा रौतहटका कृष्ण यादव विजयी भएका छन् । देउवा पक्षका उम्मेदवार यादवले ९९६ मत ल्याएर विजयी भएका हुन् । सभापतिका अर्का उम्मेदवार रामसरोज यादवले ८५५ मत प्राप्त गरे ।
प्रदेश अधिवेशनका लागि कुल १९ सय ५१ मतदातामध्ये १८ सय ८१ जनाले मात्र मतदान गरेका थिए । सभापति पदका लागि भएको मतदानमा ३० मत बदर भएको छ । औपचारिक घोषणा हुन भने बाँकी छ।
रामसरोज यादव विमलेन्द्र निधि र शेखर कोइराला समूहका हुन् । उनी प्रदेश २ का भौतिक पूर्वाधार विकासमन्त्रीसमेत हुन् । महाधिवेशनपछि सभापति देउवाविरुद्ध निधि र कोइरालाले गठबन्धन बनाएका थिए ।
नेपाली कांग्रेसको १४औं राष्ट्रिय महाधिवेशन सम्पन्न भइसक्दा प्रदेश २ को अधिवेशन भने विवादका कारण रोकिएको थियो । जसअन्तर्गत बिहीबार जनकपुरधामस्थित गोपाल धर्मशालामा मतदान भएको थियो ।
कूल ७२ पदका लागि १७४ जनाले विभिन्न पदमा उम्मेदवारी दिएका थिए। त्यसमध्ये पाँच सदस्य निर्विरोध निर्वाचित भइसकेका छन्।
