ललितपुर । स्थानीय तह को निर्वाचन नजिकिएसँगै दलहरूले घरदैलो अभियानलाई तीव्रता दिन थालेका छन्।
यही वैशाख ३० गते हुने स्थानीय तहको निर्वाचनमा सत्तारूढ (पाँच दलीय) गठबन्धन माओवादी केन्द्रको तर्फबाट टिकट पाएका महालक्ष्मी नगरपालिकाका मेयर पदका उम्मेदवार शिव कट्टेल, उपमेयरका उम्मेदवार लक्ष्मी महर्जनसहितको टोली भोट माग्न घरदैलो अभियानमा लागेका छन्।
उनी सहितको टोली आज इमाडोलको बोझेपोखरीमा जनताको घरदैलोमा गएका हुन्।
दलहरूका उम्मेदवार दैनिक रूपमा घरदैलो कार्यक्रम गरी भोट माग्न आउने क्रम बढेको इमाडोलका स्थानीय गोपी कार्कीले बताए ।
निर्वाचनका कारण अहिले महाललक्ष्मी नगरपालिकामा चुनावको चहलपहल बढेको उमंग केसी बताए । “गाउँघरका चियापसल र चोकमा समेत निर्वाचनकै कुरा हुने गरेको छ । घरदैलो अभियानमा आएका उम्मेदवारहरु आफ्नो प्रतिबद्धता सुनाउनु भएको छ । ” उनले भने, घरदैलो अभियानमा उम्मेदवारले स्थानीय विकास निर्माणका मुद्दा उठाएर मतदातालाई आश्वस्त पार्ने, पार्टीले बनाएको निर्वाचनसम्बन्धी गीतमा नाचगान गरी मतदातालाई आकर्षित गर्नेलगायतका गतिविधि सञ्चालन गर्ने गरेको उनले सुनाए ।
