ललितपुर । महालक्ष्मी नगरपालिकामा सत्तागठबन्धनका उम्मेदवारहरुले बुधबार पनि संयुक्त घरदैलो अभियान सञ्चालन गरिरहेका छन् ।
सत्तागठबन्धनबाट मेयरमा माओवादी केन्द्रका शिव प्रसाद कट्टेल, उपमेयरमा नेपाली कांग्रेसबाट लक्ष्मी महर्जन रहेका छन् ।
मेयर र उपमेयरसहित गठबन्धनबाट वडा अध्यक्ष, सदस्यहरुका उम्मेदवारहरु समेत संयुक्त घरदैलो अभियानमा छन् ।
घरदैलोमा संयुक्त ब्यानर लिएर हिँडेका नेता/कार्यकर्ताले भोट पनि हसिँया हथौडा र रुख चिन्हमा मागिरहेका छन् ।
आज महालक्ष्मी नगरपालिका वडा नं. ८ को विष्णुडोल, शंखादेवी, नेपाल चौर क्षेत्रमा घरदैलो कार्यक्रम सञ्चालन गरेको नेपाली कांग्रेस महालक्ष्मी नगरपालिकाका उपसभापति विवेक कार्कीले बताए ।
कांग्रेस र माओवादी केन्द्रको संयुक्त घरदैलो कार्यक्रममा उक्त क्षेत्रलाइ एक नयाँ वडा बनाउने र भैराखेको विकास निर्माणलाई ध्यान दिई नमुना गाउँ बनाउने उम्मेदवारहरुले प्रतिबद्धता व्यक्त गरेको उपसभापति कार्कीको भनाई छ ।
स्थानीयले मेयरका उम्मेद्वार कट्टेल, उपमेयरकी उम्मेद्वार महर्जनलगायतका उम्मेद्वारहरुलाई टिका, खादा र अबिर लगाएर बिजयको लागि अग्रिम शुभकामना दिएका थिए ।
मेयरका उम्मेदवार कट्टेलले वैशाख २७ गतेसम्म संयुक्त घरदैलो अभियान चल्ने बताए । बिहान घरदैलो गर्ने र दिउँसो सामुहिक भेटघाट गर्ने गरी चुनावी प्रचारलाई व्यवस्थित गरिएको उनले जानकारी दिए ।
यसअघि संयुक्त गठबन्धनले आइतबार वडा नं. १, २, सोमबार वडा नं. ५ र मंगलबार वडा नं. ३ मा संयुक्त रुपमा घरदैलो अभियान संचालन गरेका थिए ।
