ललितपुर । नेकपा (एमाले) ललितपुर जिल्लाको नवौैँ जिल्ला अधिवेशनको नजिकिँदै जाँदा चहलपहल समेत बढ्दै जान थालेको छ ।
नेकपा एमाले ललितपुरको नवौं जिल्ला अधिवेशनमा अध्यक्षलगायत पदाधिकारीमा चुनाव हुने आकलन बढेसँगै एकपछि अर्को गरेर अध्यक्षका उम्मेदवारहरू देखा पर्न थालेका छन् ।
अध्यक्षको उम्मेदवारमा पुरुषोत्तम आचार्य, चेतनाथ सञ्जेल र दिनेश कार्की आकाक्षा व्यक्त गरेको एमाले स्रोतले बताएको छ ।
विद्यार्थी राजनीतिबाट उदाएका आचार्यले आफ्नो राजनीतिक यात्राका क्रममा राजनीतिक परिवर्तनको नेतृत्व गर्दा राजद्रोहको मुद्दासमेत खेपेका थिए । आचार्यले लामो समय जिल्ला कमिटिमा रहँदै सचिवको समेत कूशलतापूर्वक जिम्मेवारी पूरा गरेका थिए । उनी वर्तमान जिल्ला अध्यक्ष समेत हुन् ।
यसैगरी सञ्जेल भूगोलबाट उदाएका नेता हुन् । उनी एमाले ललितपुर क्षेत्र नं. १ को पूर्व अध्यक्ष हुन् । सञ्जेल पूर्व बागमती प्रदेश सभा सदस्यसमेत हुन् ।
आचार्य र सञ्जेलबाहेक एमाले ललितपुरका नेता तथा ललितपुर–२४ का पूर्व वडाअध्यक्ष दिनेश कार्कीले अध्यक्षको आकांक्षा प्रकट गरेका छन् । उनी एमाले बागमती प्रदेश किमिटीका पूर्व सदस्य समेत हुन् ।
एमाले केन्द्रले सकेसम्म सर्वसहमतिमा नेतृत्व चयनका लागि जोडबल गरिरहेको छ ।
