ललितपुर । यही फागुन २१ गते हुने प्रतिनिधिसभा निर्वाचनका लागि ललितपुर जिल्लाका तीनवटै निर्वाचन क्षेत्रमा आज (माघ ६ गते) उम्मेदवार मनोनयन दर्ता हुँदैछ । जिल्ला निर्वाचन कार्यालय ललितपुरले निर्वाचन क्षेत्रअनुसार छुट्टाछुट्टै स्थान तोकेर मनोनयन दर्ताको सम्पूर्ण तयारी पूरा गरेको जनाएको छ ।
जिल्ला निर्वाचन कार्यालयका अनुसार ललितपुर निर्वाचन क्षेत्र नम्बर १ का उम्मेदवार मनोनयन दर्ताका लागि गोदावरी नगरपालिका, बज्रबारहीस्थित गोदावरी नगरपालिकाको भवनलाई निर्वाचन अधिकृतको कार्यालय तोकिएको छ । यस क्षेत्रअन्तर्गतका दल तथा स्वतन्त्र उम्मेदवारहरूले सोही स्थानमा पुगेर उम्मेदवारी दर्ता गराउनुपर्नेछ ।
त्यस्तै ललितपुर निर्वाचन क्षेत्र नम्बर २ का उम्मेदवार मनोनयन दर्ता कार्यक्रमका लागि सातदोबाटोस्थित नेपाल ओलम्पिक कमिटीको भवनलाई निर्वाचन अधिकृतको कार्यालय तोकिएको जिल्ला निर्वाचन कार्यालयले जानकारी दिएको छ ।
ललितपुर निर्वाचन क्षेत्र नम्बर ३ का उम्मेदवारहरूको मनोनयन दर्ता भने स्थानीय विकास प्रशिक्षण प्रतिष्ठान स्थित मुख्य निर्वाचन अधिकृतको कार्यालयमै हुने बताइएको छ ।
निर्वाचन कार्यालयका अनुसार तीनवटै निर्वाचन क्षेत्रमा उम्मेदवारी मनोनयन दर्ता गर्ने समय बिहान १० बजेदेखि बेलुका ५ बजेसम्म तोकिएको छ । तोकिएको समयभित्र आवश्यक कागजातसहित उपस्थित भई उम्मेदवारी दर्ता गराउन दल तथा स्वतन्त्र उम्मेदवारहरूलाई आग्रह गरिएको छ ।
यसैबीच, प्रमुख राजनीतिक दलहरूले उम्मेदवारी दर्ताको समयतालिका सार्वजनिक गरेका छन् । नेपाली कम्युनिष्ट पार्टी (नेकपा) ले ललितपुर निर्वाचन क्षेत्र नम्बर १ अन्तर्गत उम्मेदवार मनोनयन दर्ता कार्यक्रमका लागि मध्याह्न १२ बजेको समय तय गरेको जनाएको छ ।
त्यसैगरी नेकपा एमाले ले दिउँसो २ बजे गोदावरी नगरपालिका भवनमा उम्मेदवार दर्ता गर्ने कार्यक्रम रहेको जानकारी दिएको छ । नेपाली कांग्रेसले भने दिउँसो ३ बजे उम्मेदवार मनोनयन दर्ता गर्ने निर्णय गरेको र सो सम्बन्धी जानकारी विज्ञप्तिमार्फत सार्वजनिक गरेको छ ।
निर्वाचन कार्यालयले मनोनयन दर्ताको दिन शान्ति, सुरक्षा र व्यवस्थापनका लागि आवश्यक सबै तयारी गरिएको जनाएको छ । उम्मेदवारी दर्ता भएसँगै ललितपुर जिल्लामा प्रतिनिधिसभा निर्वाचनको राजनीतिक माहोल थप तात्नेछ
