काठमाडौं । संसद्मा नेपालको संविधान दोस्रो संशोधन विधेयक पेस भएको छ । सरकारले संसद्मा पेस गरेको संविधान संशोधन नेकपा र नेपाली कांग्रेसले समर्थन गर्ने निश्चित भएपछि दुई तिहाइबाट पारित हुने सुनिश्चित भएको हो ।
कानुनमन्त्री डा. शिवमाया तुम्बाहाङ्फेले प्रस्ताव प्रस्तुत गर्न मागेको अनुमतिमा विरोधको सूचना नआएकाले सभामुख अग्निप्रसाद सापकोटाले विधेयक पेस गर्न अनुमति दिएका थिए । सरकारले नेपालको अद्यावधिक नक्सा प्रकाशन गरेपछि संविधानको अनुसूचीमा रहेको निशान छापमा रहेको नेपालको नक्सा पनि परिवर्तन गर्न संविधान संशोधन गर्न लागिएको हो । नेपालको संविधानको अनुसूची ३ मा रहेको निशान छापको नक्सा संशोधनका लागि सरकारले संसद् सचिवालयमा केही दिनअघि संशोधन विधेयक दर्ता गराएको थियो । अद्यावधिक नक्सामा कालापानी, लिपुलेक र लिम्पियाधुरालगायतका क्षेत्र पनि समावेश छन् ।
मन्त्रिपरिषद् बैठकले ५ जेठमा लिम्पियाधुरा, कालापानी, लिपुलेकलगायतका भूभाग समेटिएको नयाँ नक्सा पारित गरेको थियो । त्यसको दुई दिनपछि भूमि व्यवस्था मन्त्रालयले अद्यावधिक नक्सा औपचारिक रूपमा सार्वजनिक गरेको थियो । संविधान संशोधन विधेयक गत ९ जेठमा संसद् सचिवालयमा दर्ता भएको थियो ।
१४ जेठको संसद् बैठकको सम्भावित कार्यसूचीमा संविधान संशोधन प्रस्ताव पेस गर्ने उल्लेख थियो । तर, प्रधानमन्त्री केपी शर्मा ओलीले संविधान संशोधन प्रस्तावलाई सर्वसम्मत पारित गराउन गृहकार्य गर्नुपर्ने भनेपछि र प्रमुख प्रतिपक्षी कांग्रेसले ‘केन्द्रीय समितिबाट निर्णय गर्छौं’ भनी समय मागगरेपछि १४ जेठको कार्यसूचीबाट संविधान संशोधन हटाइएको थियो ।
राजधानी दैनिकमा सविन शर्माले लेखेका छन् ।
