काठमाडौं । काठमाडौंको नर्भिक इन्टरनेशनल अस्पतालमा उपचार गराइरहेकी एक बिरामीमा कोरोना संक्रमण देखिएको छ । मकवानपुरकी ६१ वर्षीया महिलामा कोरोना संक्रमण भएपछि उनको सम्पर्कमा आएकालाई क्वारेन्टाइनमा राख्न सुरु गरिएको छ । संक्रमित महिलालाई पाटन अस्पतालको आइसोलेसनमा राखिएको छ । उनी नर्भिकमा भर्ना भएर उपचार गरारहेकी महिला हुन् ।
पाटन अस्पतालका निर्देशक डा विष्णु शर्माले नर्भिकमा उपचार गराइरहेकी महिलालाई पाटनको आइसोलेसनमा राखिएको जानकारी दिएका छन् ।
कोरोना पुष्टि भएपछि नर्भिक सील हुने हल्लाले बिरामी महिलालाई हतार हतार पाटन लगिएको बताइएको छ । नर्भिकमा पनि कोरोना उपचार गर्ने आइसोलेसन वार्ड छ, तर महिलालाई भने त्यहाँ उपचार नगरी पाटन ल्याइएको हो ।
