ललितपुर । भक्तपुर–१ चुनदेवीमा अरनिको राजमार्गको सर्भिस ट्रयाकमा पानी जान बनाएको ढलमा पानीको बेगले हानेर ढलभित्र छिरेका ट्रक चालकको शव बिहीबार ललितपुरमा भेटिएको छ ।
बागमती गाउँपालिका वडा नं. १ घुसेल भन्ने ठाउँमा शव मकवानपुरका स्थानीय मानिसले देखेपछि प्रहरीलाई खबर गरी पहिचान गर्दा सिन्धुली रानीचुरी स्थायी घर भई हाल हेटौँडा नगरपालिका–९ बस्ने ५७ वर्षीय चालक नरबहादुर राउतको शव भेटिएको हो ।
स्थानीयले खबर गरेपछि महानगरीय प्रहरी वृत्त चापागाउँका प्रहरी निरीक्षक राजेन्द्र थापा नेतृत्वको टोली घटनास्थल गएको थियो ।
ढलबाट छिरेदेखि नै नेपाल प्रहरी, सशस्त्र प्रहरी र नेपाली सेनाको टोलीले हनुमन्तेखोला हुँदै ललितपुर र काठमाडौँको नदीमा खोजीकार्य जारी राखेका थिए ।
बिहीबार स्थानीयवासीले शव देखेपछि प्रहरीले मृतकको आफन्तमार्फत शवको पहिचान गरी पोष्ट मार्टमका लागि पाटन हस्पिटल पठाएको प्रहरी वृत्त चापागाउँका डीएसपी कृष्णराज ओझाले जानकारी दिए । राउत बेपत्ता भएपछि भक्तपुर परीसरले महानगरीय प्रहरी कार्यालय रानीपोखरीलाई जानकारी गराएको थियो । रानीपोखरीको परिपत्र, उपलब्ध फोटो र उनका आफन्त आएपछि राउतको शवको पहिचान भएको ओझाको भनाई छ ।
