काठमाडौं । उदयपुर, उदयपुरगढी गाउँपालिका-७ बाघखोरस्थित सडकमा स.१ त ५१०७ नम्बरको ट्याक्टर बिहीबार दिउँसो अनियन्त्रित भई दुर्घटना हुँदा ट्याक्टरमा सवार उक्त ट्याक्टर चालककी छोरी सोही गाउँपालिका-६ बस्ने ९ वर्षीया बिबिषा पाण्डेको घटनास्थलमै मृत्यु भएको छ । दुर्घटनामा सोही ठाउँ बस्ने ४० वर्षीया सर्मिला तामाङ समान्य घाइते भएकी छन् । ट्याक्टर चालकलाई प्रहरीले नियन्त्रणमा लिएको छ ।
भोजपुर, रामप्रसाद राई गाउँपालिका-५ स्थित सडकमा को.२ त ८७१४ नम्बरको ट्याक्टर बिहीबार दिउँसो अनियन्त्रित भई सडकबाट करिब ५० मिटर तल खसेर दुर्घटना हुँदा ट्यक्टरमा सवार सोही ठाउँ बस्ने नन्दलाल पराजुलीको छोरी १४ वर्षीया पुष्पा पराजुलीको घटनास्थलमै मृत्यु भएको छ । दुर्घटनामा अन्य ५ जना घाइते भएकाले उपचारको लागि जिल्ला अस्पताल भोजपुर पठाइएको छ । ट्याक्टर चालक हाल फरार रहेकोले प्रहरीले खोजी गरिरहेको छ ।
बाग्लुङ, तमानखोला गाउँपालिका-५ खुंखानी बस्ने २५ वर्षीय धन बहादुर श्रीपालीको लु.४ त ४०९७ नम्बरको ट्याक्टरबाट खसेर सोही ट्याक्टरले किच्दा बिहीबार साँझ घटनास्थलमै मृत्य भएको छ । उक्त ट्याक्टरको सहचालक समेत रहेका श्रीपाली गाउँपालिका-१ सेतारास्थित सडकमा ट्याक्टरबाट अचानक खसेको बताइएको छ । हाल फरार चालकको प्रहरीले खोजी गरिरहेको छ ।
नवलपरासी (पश्चिम), सुनवल नगरपालिका-७ समयटोलास्थित सडकमा लु.२३ प २७०१ नम्बरको मोटरसाइकल बिहीबार राति अनियन्त्रित भई दुर्घटना हुँदा मोटरसाइकल चालक सोही ठाउँस्थित शिसहानी बस्ने ३५ वर्षीय केशब बस्यालको मृत्यु भएको छ । दुर्घटनामा गम्भीर घाइते भएका केशबको जेनस अस्पताल बुटवलमा उपचारको क्रममा मृत्यु भएको हो । दुर्घटनामा मोटरसाइकलमा सवार अन्य २ जना समेत घाइते भएकाले सोही अस्पतालमा उपचार भइरहेको छ ।
यसैगरी नवलपरासी (पश्चिम), बर्दघाट नगरपालिका-१० ध्रुवटोलस्थित सडकमा हाल नम्बर नखुलेको सवारी साधनले शुक्रबार बिहान ठक्कर दिँदा मागी खाई हिँड्ने हाल नाम, थर, वतन नखुलेकी करिब ६० वर्षीया महिलाको मृत्यु भएको छ । दुर्घटनामा गम्भीर घाइते भएकी ती महिलाको जिल्ला अस्पताल परासीमा उपचारको क्रममा मृत्यु भएको हो । ठक्कर दिने सवारी साधनको प्रहरीले खोजी गरिरहेको छ ।
यस सम्बन्धमा प्रहरीले आवश्यक अनुसन्धान गरिरहेको छ ।
