काठमाडौँ । पछिल्लो २४ घण्टामा नेपालमा नोभेल कोरोना भाइरसका हालसम्म कै धेरै संक्रमित थपिएका छन् । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार पछिल्लो २४ घण्टामा ६७१ संक्रमित थपिएका बताएका छन् । जसमा पुरुष ५९१ र महिला ८० रहेका छन् । योसँगै कोरनाबाट संक्रमितको संख्या ७ हजार ८ सय ४८ पुगेको छ । यस अघि बुधबार एकैदिन बुधबार ५८६, मंगलबार ३८० संक्रमित थपिएका थिए ।
मन्त्रालयका अनुसार अहिलेसम्म पीसीआर विधिबाट १ लाख ५५ हजार ५ सय १८ र आरडीटी विधिबाट २ लाख ४३ हजार ७५ जनाको नमुना परीक्षण गरिएको छ । आज पिसिआरबाट ५ हजार ७ सय ४६ र आरडिटीबाट ९ हजार १३२ परीक्षण गरिएको छ । संक्रमितको संख्या ७८ सय ४८ पुग्दा ११ सय ८६ जनाले कोरोना जितेका छन्, जसमा पुरुष १ हजार ७२ र ११४ महिला रहेका छन् । आज १९ जना डिस्चार्ज भएका छन् ।
अहिले क्वारेन्टाइनमा १ लाख १६ हजार २ सय १५ जनालाई राखिएको छ । मन्त्रालयका अनुसार ६ हजार ६ सय ४८ जनाको आइसोलेसनमा उपचार भइराखेको छ।
त्यस्तै कोरोना संक्रमणबाट थप दुई जनाको मृत्यु भएको छ । स्वास्थ्य तथा जनसंख्या मन्त्रालय प्रवक्ता डा. जागेश्वर गौतमका अनुसार मृत्यु हुनेमा कैलालीका दुई जना रहेका छन् ।
योसँगै मृत्यु हुनेको संख्या २२ पुगेको छ । यसअघि कोरोना संक्रमणले सिन्धुपाल्चोक, बारा, ललितपुर, अर्घाखाँची, दैलेख, बाजुरा, दोलखा, पाल्पा, सुर्खेत, कैलाली, डोल्पा, स्याङ्जा, चितवन, अर्घाखाँची, विरगञ्ज, पर्सा, बाँकेमा एक÷एक जनाको मृत्यु भएको छ । गुल्मीमा कोरोनाबाट दुई जनाको मृत्यु भएको छ ।
