काठमाडौं । पछिल्लो २४ घण्टामा देशका विभिन्न प्रयोगशालामा गरिएको ४ हजार ७११ जनामा पिसीआर परीक्षणमा ३१६ जना संक्रमित थपिएका छन् । स्वास्थ्य तथा जनसंख्या मन्त्रालयले कोरोना अपडेटबारे नियमित प्रेस ब्रिफिङमा यस्तो जानकारी दिएको हो । मंगलबार थपिनेमा ७१ महिला र २ सय ४५ पुरुष गरी ३ सय १६ जना छन् । योसँगै नेपालमा कोरोना संक्रमितको संख्या १३ हजार ५ सय ६४ पुगेको छ । जसमा महिला १ हजार ६५७ र पुरुष ११ हजार ९०७ जना रहेका छन् ।
आज काठमाडौंमा १२ जना, भक्तपुरमा १ र ललितपुरमा १ जना कोरोना संक्रमित देखिएको छ ।
मन्त्रालयका अनुसार मंगलबार देशभर ५७ हजार ७० जना क्वारेन्टाइनमा रहेका छन् । त्यस्तै कुल १० हजार ३४१ जना आइसोलेसनमा उपचाररत रहेका छन् ।
पछिल्लो २४ घण्टाका अवधिमा पुरुष ५१ र ९ महिलासहित ६० जनाले कोरोना भाइरसलाई जितेर डिस्चार्ज भएका छन् । योसँगै नेपालमा डिस्चार्ज हुनेको संख्या ३ हजार १९४ जना पुगेको छ । जसमा २७७ जना महिला रहेका छन् भने २ हजार ९१७ जना पुरुष रहेका छन् ।
नेपालका ७७ जिल्लामा कोरोना भाइरसको संक्रमण फैलिएको छ । हालसम्म नेपालमा कोरोना संक्रमणका कारण निधन हुनेको संख्या २९ पुगेको छ ।
