ललितपुर । ललितपुरका पाँच जनामा कोराना भाइरस (कोभिड १९) भएको छ । स्वास्थ्य तथा जनसंख्या मन्त्रालयका प्रवक्ता जागेश्वर गौतमले नियमित प्रेस ब्रिफिङमा ५ जना संक्रमित भएको पुष्टि गरेका हुन् । संक्रमितहरुमा ४ महिला र १ पुरुष जना रहेको गौतमले बताए ।
स्वास्थ कार्यालय ललितपुरका प्रमुख डा. खगेश्वर गेलालका अनुसार आज देखिएका संक्रमितहरुमा गोदावरी नगरपालिका वडा नं. ११ चापागाउँका ६६ वर्षिय पुरुष, महालक्ष्मी नगरापलिका वडा नं. ८ लुभुका २३ वर्षको महिला रहेका छन् ।
त्यस्तै ललितपुर महानगरपालिका वडा नं. १५ सातदोबाटोका ३४ वर्षिय महिला, ललितपुर महानगरपालिका वडा नं १४ थसीखेलका ३३ वर्षिय महिला र ललितपुर महानगरपालिका वडा नं. २३ हात्तीवनका २४ वर्षिय महिला रहेका छन् । सातदोबाटोमा भेटिएका संक्रमित अल्का हस्पिटलमा स्वास्थ्यकर्मी रहेको डा।गेलालले बताए ।
पाँचैजनालाई ललितपुरको पाटन अस्पताल राखिएको छ । अस्पतालको कोभिड वार्डको आइसोलेसनमा राखेर उपचार भइरहेको डा. गेलालले जानकारी दिए ।
