काठमाडौं । पार्टीभित्र देखिएको गतिरोध समाधान गर्न बसेको सत्तारुढ नेकपाको स्थायी कमिटी बैठक एक हप्ताका लागि स्थगित भएको छ ।
मंगलबार प्रधानमन्त्री निवास बालुवाटारमा १५ मिनेट बसेको बैठक मुलुकभर परेको बाढी, पहिरोको कारण १३ गतेसम्मको लागि स्थगित भएको नेता देबेन्द्र पौडेलले जानकारी दिए ।
अध्यक्ष तथा प्रधानमन्त्री केपी शर्मा ओली अनुपस्थित रहेको बैठकको अध्यक्षता कार्यकारी अध्यक्ष पुष्पकमल दाहाल प्रचण्डले गरेका थिए ।
सोमबारदेखि जारी अविरल वर्षाले पारेको जनधनको क्षतिको लागि उद्धार र राहतमा जुट्ने प्रस्ताव पारित गर्दै बैठक एक हप्ता स्थगित गर्ने निर्णय गरिएको उनले बताए ।
बैठकले केहीदिनदेखि मुलुकभर जारी बाढी पहिरोको उद्धारमा जुट्ने प्रस्ताव पारित ग¥यो,’ उनले भने । विहान ११ बजेका लागि तय गरिएको बैठक नेताहरुको व्यस्तताका कारण भन्दै दिउँसो १ बजेको लागि सारिएको थियो । स्थायी कमिटी बैठक अघि ओली र प्रचण्डबीच बालुवाटारमा छलफल भएको थियो । २ अध्यक्षको बैठक लगत्तै बसेको बैठक स्थगित भएको हो ।
मंगलबार विहान प्रचण्डले महासचिव विष्णु पौडेल र स्थायी कमिटी सदस्य जनार्दन शर्मासँग छलफल गरेका थिए । त्यस्तै मंगलबार नै बरिष्ठ नेता झलनाथ खनाल, माधवकुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठसँग पनि प्रचण्डले छलफल गरेका थिए ।
