ललितपुर । १४ औं महाधिवेशन अन्तर्गत नेपाली कांग्रेस ललितपुर सभापतिका लागि मीनकृष्ण महर्जन, जितेन्द्र कुमार श्रेष्ठ र रामकृष्ण चित्रकारले बहुमत पुर्याउन सकेनन् ।
आज ललितपुरको स्टाफ कलेजमा भएको मतदानमा सभापतिका ३ जना उम्मेदारमध्ये कसैले पनि बहुमत प्राप्त गर्न नसकेका हुन् ।
सभापतिका लागि रामकृष्ण चित्रकारले ५०४, जितेन्द्र श्रेष्ठले ४८२ र मीनकृष्ण महर्जनले ३३६ मत प्राप्त गरेका छन् ।
अब सबैभन्दा बढी मत ल्याउने चित्रकार र श्रेष्ठबीच भोलि फेरि प्रतिस्पर्धा हुने भएको छ । भोली विहान ८ बजेदेखि १ बजेसम्म मतदान हुने कांग्रेसले जनाएको छ ।
ललितपुरमा श्रेष्ठ र महर्जन एउटै टिमबाट सभापतिको उम्मेदवार हुन् । उनीहरू दुवैले एउटै मञ्चबाट सभापतिमा उम्मेदवारी दिएका थिए । तर, अरु पदाधिकारीमा संयुक्त प्यानल उठाएका छन् । महर्जनको राजनीतिक पृष्ठभूमि राम्रो नभएको कांग्रेसका मतदाताको बुझाइ रहेको छ ।
सभापतिमा अलगअलग उम्मेदवारी दिए पनि दोस्रो चरणमा प्रतिस्पर्धा गर्दा कम मत ल्याउनेले बढी मत ल्याउनेलाई सघाउने समझदारी भएको थियो ।
नेता उदयशमशेर राणाले सहजीकरण गरेपछि अब दोस्रो चरणमा महर्जनले जितेन्द्रलाई सघाउनेछन् ।
महर्जनलाई आएको मत जितेन्द्रलाई थपिए पहिलो चरणमा सबैभन्दा बढी मत ल्याउने चित्रकार पराजित हुनेछन् ।
यो पनि पढ्नुहोस
