ललितपुर । नेपाली कांग्रेसको ललितपुर जिल्ला सभापतिमा जितेन्द्रकुमार श्रेष्ठ विजयी भएका छन् । आज भएको दोस्रो चरणको मतदानमा उनले ६६५ मत पाए भने अर्का उम्मेदवार रामकृष्ण चित्रकारले ६५३ मत पाए । ३ मत बदर भएको थियो ।
विजयी श्रेष्ठलाई कांग्रेस सभापति शेरबहादुर देउवा पक्षका नेता उदय शम्शेर राणाको समर्थन थियो । जिल्ला सभापति चयनका लागि हिजो मीनकृष्ण महर्जन, जितेन्द्र कुमार श्रेष्ठ र रामकृष्ण चित्रकारबीच प्रतिस्पर्धा भएको थियो । तर मतगणनामा कुनै उम्मेदवारले पनि ५१ प्रतिशत मत पाउन नसकेपछि बढी मत ल्याउने श्रेष्ठ र चित्रकारबीच दोस्रो चरणमा प्रतिस्पर्धा भएको थियो ।
सभापतिका लागि हिजो चित्रकारले ५०४, श्रेष्ठले ४८२ र महर्जनले ३३६ मत ल्याएका थिए ।
शनिबार भएको मतगणनामा कम मत आएपछि सभापतिका उम्मेदवार मीनकृष्ण महर्जन बाहिरिएका थिए । तर महर्जनले चित्रकारलाई समर्थन गरेका थिए ।
चित्रकारलाई निवर्तमान सभापति मदन बहादुर अमात्य, ललितपुर महानगरपालिकाका मेयर चिरबाबु महर्जन, गोदावरी नगरपालिकाका मेयर गजेन्द्र महर्जनको समर्थन थियो ।
