ललितपुर । नेकपा (माओवादी केन्द्र) सहितको सत्ता गठबन्धन ललितपुरको बैठक बसेको छ । नेपाली कांग्रेस ललितपुर पार्टी कार्यालय नख्खीपोटमा दिउँसो बैठक बसेको हो ।
बैठकले ललितपुरको ६ वटै स्थानीय तहमा पाँचै दलका ३/३ जना रहेको संयन्त्र बनाइएको छ । संयन्त्रमा रहेका नेताहरूले पालिका र नगरस्तरको वास्तविक अवस्था, मतदाता संख्या, पार्टी कमिटी सबै समेटेर सम्बन्धित पार्टीलाई रिपोर्टिङ गर्ने सहमति भएको एक नेताले दैनिकीन्युजलाई बताए । सोही रिपोर्टको आधारमा जिल्लाको बैठक बस्ने र चुनावी तालमेलबारे प्रस्ताव केन्द्रमा बुझाउने तयारी छ । केन्द्रमा पठाएको रिपोर्ट अनुमोदन भएपछि स्थानीय तह भागवण्डा हुने र त्यही अनुसार ललितपुरका ७१ वटै वडा पनि बाँडफाँड हुनेछ ।
बैठकमा नेपाली कांग्रेस जिल्ला अध्यक्ष जितेन्द्र मलेखु, नेकपा माओवादी केन्द्रका जिल्ला संयोजक शिवप्रसाद कट्टेल, नेकपा एकीकृत समाजबादीका केन्द्रिय सदस्य तथा ललितपुर सह-इन्चार्ज अमृत तिमल्सिना, जिल्ला संयोजक हरिकृष्ण थापा, जनता समाजवादी पार्टी (जसपा)का प्रतिनिधि सुरेन्द्र महर्जन, राष्ट्रिय जनमोर्चाका प्रतिनिधि लालमणि बञ्जाडे सहभागी थिए ।
ललितपुरमा ६ वटा स्थानीय तह र ७१ वटा वडा छ । वैशाख ३० गते हुने निर्वाचनमा ललितपुरमा साना ३१ दल दर्ता भएका छन् । निर्वाचन कार्यालय ललितपुर प्रमुखका अनुसार राष्ट्रिय पार्टी रहेका ६ दल सहित ललितपुरमा ३७ दलले स्थानीय निर्वाचनमा भाग लिनेछन् ।
ललितपुरमा महिला १ लाख २४ हजार ९५० र पुरुष १ लाख १८ हजार ९३३, अन्य एक जना गरी कुल २ लाख ४३ हजार ८८५ मतदाता छन् । अन्यमा रहेका एकजनाले सर्वोच्चमा मुद्दा जितेर महिला बनेकी छन् ।
यो पनि पढनुहोस
ललितपुरमा माओवादीसहित गठबन्धनको बैठक बस्दै, ६ स्थानीय तहको भागबन्डा हुने
