काठमाडौं । प्रधानमन्त्री निवास बालुवाटारमा बसेको सत्तारुढ गठबन्धनका शीर्ष नेताहरुको बैठकले गठबन्धनविपरीत ६ महानगर र ११ उपमहानगरमा दिएका उम्मेदवारी फिर्ता लिन सम्बन्धित पार्टीलाई निर्देशन दिने निर्णय गरेको छ।
बैठकले ७ बुँदे निर्देशन दिँदै गठबन्धनकै दलभित्रबाट बागी उम्मेदवारी दर्ता गरेका उम्मेदवारहरुलाई पछि सर्न पार्टीले आवश्यक काम गर्नुपर्ने पनि भनेको छ।
बैठकपछि शीर्ष नेताहरुले जारी गरेको विज्ञप्तिअनुसार ६ महानगर र ११ उपमहानगरमा प्रदेश र जिल्ला संयन्त्रको बैठकले वडाका सिट बाँडफाँट गर्ने निर्णय पनि भएको छ।
त्यस्तै नगरपालिका र गाउँपालिकामा गठबन्धनको निर्णयविपरीत पार्टीहरुले गरेका बेग्लाबेग्लै उम्मेदवारी दर्ता पनि फिर्ता लिने निर्णय पनि शीर्ष नेताहरुको बैठकले गरेको छ।
गठबन्धनको केन्द्रीय तहमै महानगर र उपमहानगरभित्र भएको बाँडफाँटविपरीत दोहोरो तथा बागी उम्मेद्वारी परेको छ ।
