घोराही । लुम्बिनी प्रदेशका स्वास्थ्य राज्यमन्त्री विमला वलीलाई प्रहरीले नियन्त्रणमा लिएको छ । दाङको तुलसीपुरमा एक महिलामाथि कुटपिट गरेको भन्दै प्रहरीले मंगलबार बिहान राज्यमन्त्री वलीलाई नियन्त्रणमा लिएको इलाका प्रहरी कार्यालय तुलसीपुरका प्रहरी निरीक्षक रञ्जन स्वाँरले जानकारी दिए ।
उनका अनुसार राज्यमन्त्री वलीले तुलसीपुर उपमहानगरपालिका–५का एकराज बस्नेतकी श्रीमती मीना भण्डारीलाई हातपात गरेकी थिइन । घरमै पुगेर उनले भण्डारीलाई हातपात गर्दा विवाद भएपछि प्रहरीले राज्यमन्त्री वलीलाई नियन्त्रणमा लिएको थियो ।
‘‘स्वास्थ्य राज्यमन्त्रीज्यूले एकराज बस्नेतकी श्रीमती मीना भण्डारीलाई कुटपिट गरेपछि त्यहाँ विवाद भएको रहेछ,’’ प्रहरी निरीक्षक स्वाँरले भने, ‘‘प्रहरीलाई जानकारी आएपछि हामी त्यहाँ पुगेर राज्यमन्त्री वलीलाई लिएर आएका हौँ । अहिले विवादका बारेमा बुझ्ने काम भइरहेको छ ।’’
उनका अनुसार राज्यमन्त्री वलीलाई नियन्त्रणमा लिएर घटनाबारे सोधपुछको काम भइरहेको छ ।
उनी लु १ झ ५३७ नम्बरको सरकारी गाडी चढेर त्यहाँ पुगेकी थिइन् । घटना हुँदा एकराज घरमा थिएनन् । उनका आफन्तहरुले प्रहरीलाई खबर गरेका थिए ।
नेकपा एमालेबाट दाङ ३ खबाट प्रदेशसभा सदस्य निर्वाचित भएका उत्तरकुमार वलीको दुर्घटनामा मृत्यु भएपछि तत्कालीन नेकपाबाट उनकी श्रीमती विमला वली सांसद निर्वाचित भएकी थिइन् । नेकपा विभाजनपछि उनी नेकपा (माओवादी केन्द्र) मा लागेकी थिइन् ।
