काठमाडौँ । नेपाल पञ्चाङ्ग निर्णायक विकास समितिले यसवर्षको भाइटीकाको उत्तम साइत यही कात्तिक १० गते बिहीबार बिहान ११ः३७ मिनेटमा जुरेको जनाएको छ । समितिले बिहीबार बिहान ११ः३७ मिनेटमा किजापूजा र भाइटीकाको उत्तम साइत जुरेको बताएको हो ।
पञ्चाङ्ग समितिका पूर्वअध्यक्षसमेत रहेका प्रा.रामचन्द्र गौतम भने बिहीबार दिनभर नै टीका लगाउन मिल्ने बताउँछन् ।
कात्तिक कृष्ण त्रयोदशीदेखि कात्तिक शुक्ल द्वितीयासम्म यमपञ्चक अर्थात् तिहार पर्व मनाइन्छ । यस वर्ष कात्तिक ६ गतेदेखि यमपञ्चक सुरु भएको हो । कात्तिक ६ गते आइतबार कागतिहार, कात्तिक ७ गते सोमबार कुकुरतिहार र लक्ष्मीपूजा, कात्तिक ८ गते मंगलबार गाईपूजा, कात्तिक ९ गते बुधबार गोवर्द्धन पूजा/म्हपूजा, र कात्तिक १० गते भाइटीका र किजापूजा परेको छ ।
