भक्तपुर । भक्तपुर निर्वाचन क्षेत्र नम्बर २ बाट प्रतिनिधिसभा सदस्यमा नेपाली कांग्रेसका उम्मेदवार दुर्लभ थापा निर्वाचित भएका छन् । बिहीबार बिहान सकिएको मत गणनामा थापाले नेकपा (एमाले) का उम्मेदवार महेश बस्नेतलाई ८२३ मतान्तरले पराजित गरेका हुन् ।
थापाले २३ हजार ५०० मत पाए भने निकटतम प्रतिस्पर्धी बस्नेतले २२ हजार ६७७ मत पाए । त्यसैगरी नेमकिपाकी अनुराधा थापा मगरले ६ हजार ९५४, राष्ट्रिय स्वतन्त्र पार्टीका साजन विकले ३ हजार ८२० र राप्रपाका मोहन केसीले २ हजार ४८६ मत पाएका छन् ।
यो क्षेत्रमा ६३ हजार ८४२ मत खसेकोमा ६१ हजार ७९१ सदर भएको थियो । २ हजार ५१ मत भने बदर भयो ।
