काठमाडौं । नेपाल बैदेशिक रोजगार व्यवसायी संघको निर्वाचनमा प्रगतिशील वैदेशिक रोजगार व्यावसायी मंचले ऐतिहासिक विजय प्राप्त गरेको छ । शुक्रबार भएको संघको २९ औं साधारणसभाको निर्वाचनमा मञ्चका उम्मेदवार रहेका राजेन्द्र भण्डारीको प्यानलले सबै मुख्य पदसहित विजय पाप्त गरेको हो ।
भण्डारीले नेपाली कांग्रेस निकट भुवनसिंह गुरुङलाई पराजित गर्दै विजय हासिल गरेका हुन् । शनिबार बिहान सम्पन्न मतगणनामा भण्डारीले १९९ मत प्राप्त गरी बिजयी हुँदा गुरुङले १५७ मत पाए । यस्तै अर्का उम्मेदवार कुमुद खनालले १३१ र इश्वर जिसीले १२८ मत प्राप्त गरे ।
भण्डारी एमाले निकट प्रगतिशील वैदेशिक रोजगार व्यवसायी मञ्चका अध्यक्ष हुन् । महासचिव र सचिव बाहेक सबै पदाधिकारी भण्डारी समूहका निर्वाचित भएका छन् ।
सो प्यानलबाट अध्यक्षमा राजेन्द्र भण्डारी, प्रथम उपाध्यक्षमा डिक बहदुर खत्री (कुमार), द्वितीय उपाध्यक्षमा सन्जु गुरुङ , तृतीय उपाध्यक्षमा रोशन कटुवाल, महासचिवमा मेघनाथ भुर्तेल, सचिब मा कर्णराज कटुवाल, कोषाध्यक्षमा सरिता घलेले विजय प्राप्त गरेका हुन् ।
यस्तै भण्डारी प्यानलबाट सदस्यहरुमा राजेन्द्र बस्नेत, बैकुण्ठ प्रसाद पौडेल (वैभव), देउमान नेम्वाङ (डिएम सुब्बा) आनन्दप्रसाद कोइरालाले विजय प्राप्त गरेका हुन् । यसैगरि अन्य सदस्यामा बिक्रम श्रेष्ठ, देविमाया थापा, कैलाश पाठक, नारायण भुसाल, तोरणकुमार कार्की र चन्द्रबहादुर लिम्बु निर्वाचित भएका छन् ।
‘व्यवहारिक वैदेशिक रोजगार ऐन परिमार्जन सहित “सुरक्षित व्यवस्थित र मर्यादित” वैदेशिक रोजगारको नारा लिएर राजेन्द्र भण्डारी नेतृत्वको व्यवसायिक समूह चुनावी मैदानमा उत्रिएको थियो ।
सरकारले एकतर्फी रुपमा वैदेशिक रोजगार सम्बन्धी नीति नियम लागू गर्दै समग्र वैदेशिक रोजगार व्यवसायीलाई धराशायी पारेको र विना कसुर व्यवसायीलाई दुख दिने क्रम बढेसँगै समग्र व्यवसायीक हकहितका लागि आफु नेतृत्वको व्यवसायिक समूहले काम गर्ने जितेपछि भण्डारीले बताए ।
