ललितपुर । ललितपुर महानगरपालिका वडा नंं २५ भैँसेपाटी फूलबारी मार्ग बस्दै आएकी धनकुटाकी ३९ वर्षीया नम्रता राईले जस्ताले छाएको टहरा न्यानो पार्न शनिबार राति आगो बालिन् । हावा नछिरोस् भनेर कोठाको चारैतिर बन्द गरिन्, तर भोलिपल्ट उनी ब्युँझन सकिनन् । टहरासँगै दन्किएको आगोमा जलेर उनको मृत्यु भयो ।
जिल्ला प्रहरी परिसर ललितपुरका अनुसार व्यापार गर्ने उद्देश्यले उनले केही दिनअघि मात्रै स्थानीय दुर्गा श्रेष्ठसँग जग्गा भाडामा लिएकी थिइन् । जग्गामा जस्ताले बारेर टहरा बनाइन् । तीन दिनअघिबाट बस्न सुरु गरेकी थिइन् । चिसो बढेपछि उनले शनिबार बेलुका आगो बालिन् । तर, ननिभाई न्यानोका कारण मस्त निदाइन् । आगो सल्किएर टहराभित्र फैलियो । तर, निसास्सिएकी उनी बाहिर आउन सकिनन् । हेर्दाहेर्दै टहरा खरानी भयो । सँगै उनी पनि जलिन् ।
प्रहरी परिसर ललितपुरका प्रहरी उपरीक्षक तथा प्रवक्ता एसपी प्रवीण पोखरेलले आगो ताप्ने क्रममा आगलागी भएको प्रारम्भिक अनुसन्धानबाट खुलेको बताए । ‘शनिबार राति भैँसेपाटीमा जस्ताको टहरामा आगलागी हुँदा एक महिलाको मृत्यु भयो । बिहान करिब ४ बजे आगो नियन्त्रणमा आयो । त्यसवेलासम्म टहरा जलेर नष्ट भइसकेको थियो । आगो ताप्ने क्रममा आगलागी भएको प्रारम्भिक अनुसन्धानबाट देखिन्छ,’ उनले भने ।
पोष्टमाटमको लागि पाटन हस्पिटल पठाइएको प्रहरीले जनाएको छ । आगलागीबाट करिब १ लाख ५० हजार बराबरको क्षति भएको प्रहरीले जनाएको छ ।
