काठमाडौं । केएल राहुल र विराट कोहलीको अर्धशतकप्रेरित भारतले आईसीसी एकदिवसीय विश्वकपको उपाधिका लागि अस्ट्रेलियाविरुद्ध २४१ रनको लक्ष्य प्रस्तुत गरेको छ ।
भारतको अहमदाबादस्थित नरेन्द्र मोदी रंगशालामा जारी खेलमा टस हारेर ब्याटिङमा आएको भारतले निर्धारित ५० ओभरमा सबै विकेट गुमाएर २४० रनको योगफल खडा गर्यो ।
भारतका केएल राहुलले १०७७ बलमा सर्वाधिक ६६ रन बनाए । तेस्रो नम्बरमा क्रिजमा आएका विराट कोहलीले ६३ बलमा चार चौकासहित ५४ रनको योगदान गरे ।
ओपनर रोहित शर्माले ३१ बलमा ४७ रन बनाएर आउट भए । चार चौका र तीन छक्का हिर्काएका रोहितलाई ग्लेन म्याक्स्वेलले ट्राभिस हेडबाट क्याच आउट गराए । भारतका लागि सूर्यकुमार यादवले १८ रनको योगदान गरे।
अस्ट्रेलियाका मिचेल स्टार्सले १० ओभरमा ५५ रन खर्चदै तीन विकेट लिए । कप्तान प्याट कमिन्स र जस हेजलवुडले समान दुई विकेट लिए ।
भारत घरेलु मैदानमा तेस्रो पटक विश्वकप उचाल्ने दाउमा छ । अस्ट्रेलिया कीर्तिमानी छैटौं पटक उपाधि जित्ने लक्ष्यमा छ ।
भारतले यसअघि १० खेलमा अपराजित रहँदै फाइनलमा स्थान बनाएको थियो। सुरुवाती दुई खेल हारेको अस्ट्रेलिया त्यसपछिका आठ खेलमा अपराजित छ ।
