ललितपुर । देशमा बेरोजगार र आर्थिकमन्दिका कारण जनताहरू भोकभोकै मर्ने अवस्थामा पुगेकोमा तिनै जनताबाट उठाएको करको दुरुपयोग गर्दै ललितपुरका एक वडा अध्यक्षले आफ्नो जन्म दिन भव्य रूपमा मनाएका छन् ।
दक्षिण ललितपुरको वागमती गाउँपालिका वडा नम्बर २ माल्टाका वडा अध्यक्ष राम बहादुर भोलुन तामाङले हिजो (बुधबार) माल्टा स्थित बगुवा खोलाको बगरमा बियरको खोला बगाउँदै आफ्नो जन्मदिन मनाएका हुन् ।
२०७९ को स्थानीय निर्वाचनमा नेपाली काङ्ग्रेसबाट उम्मेदवारी दिई वडा अध्यक्षमा निर्वाचित भएका भोलुनले जनताको करलाई ‘मामाको धनमा फुपुको श्राद्द' भन्ने उक्तिलाई चरितार्थ गरिदिएका छन ।
उनले स्थानीय तहको निर्वाचनमा ९ सय ४६ मत प्राप्त गरी वडा अध्यक्षमा निर्वाचित भएका थिए भने उनका निकटम प्रतिस्पर्धी नेकपा (एमाले) का सोम बहादुर सिंगारले २ सय ९२ मत प्राप्त गरेका थिए ।
बुधबार स्थानीय आफ्ना आसेपासे कार्यकर्ताहरूलाई कार्टुनका कार्टुन बियरले झुमाउँदै उनले आफ्नो जन्मदिन भव्य रूपले मनाएको भिडियोमा स्पस्ट देख्न सकिन्छ ।
वडा अध्यक्ष भोलुन तामाङले निर्वाचनमा पनि मनि, मसल्स र पावरको भरपूर उपयोग गर्दै निर्वाचित हुन् सफल भएका उनी निकट स्रोत बताउँछ ।
किन यसरी आफ्नो जन्मोत्सव मनाउनु पर्यो भनेर दैनिकीन्युजले जिज्ञासा राख्दा उनले आफ्नो गल्ती भएको स्विकार गरे । उनले भने, ‘केटाहरूले बगुवामा जन्मदिन मनाउन आउनु पर्यो भने म गएँ, केटाहरूको यस्तो तयारी रहेछ । आफूलाई तयारी बारे थाहा छैन ।'
