काठमाडौं । मंसिर १६ गते हुन लागेको उपनिर्वाचन आउन मात्रै ५ दिन बाँकी छ । काठमाडौं जिल्लाको कीर्तिपुर नगरपालिकाको मेयर र २ वटा वडाध्यक्षको निर्वाचनले विशेष चर्चा पाएको छ । विशेषगरी मेयरको निर्वाचन महत्त्वपूर्ण रहेको छ । मेयर पदमा निर्वाचन जित्नको लागि दलहरू र स्वतन्त्र उमेदवार प्रतिस्पर्धामा छन् ।
नेकपा (माओवादी केन्द्र) बाट मेयर पदमा उमेदवार बनेका प्रा. डा. शिवशरण महर्जनले कीर्तिपुरको वास्तविक विकासको लागि प्रतिवद्वता सार्वजनिक गरिसकेका छन् । उनले कीर्तिपुर नगरलाई नेवार सांस्कृतिक सभ्यतासहितको पर्यटकीय नगरी बनाउने योजना अगाडि सारेका छन् ।
उनले कीर्तिपुर नगरको पर्यटकीय विकासबारे यस्ता योजना बनाएका छन् ।
शिवशरणको पर्यटन प्रवर्धन योजना
– कीर्तिपुर लिच्छवी कालदेखि नै अस्तित्वमा रहँदै आएको विशेषतः नेवार समुदायको बाहुल्य भएको साँस्कृतिक रुपले धनी ऐतिहासिक तथा सांस्कृतिक नगरी हो । यहाँ बौद्ध तथा हिन्दूहरुका विहार, मठमन्दिरहरु उल्लेख्य सङ्ख्यामा रहेका छन् । चिलंच्व चैत्य तथा जगतपाल महाबिहार, नगरमण्डप श्री कीर्ति बिहार, आदिनाथ मन्दिर, बाघभैरब मन्दिर, उमामहेश्वर मन्दिर, जलविनायक मन्दिर, चम्पादेवी आदि जस्ता धार्मिक सम्पदाहरु अवलोकनका लागि प्रसिद्ध छन् । त्यस्तै गरी पुष्पलाल पार्क, टौदह, चोभार, माकोचा आदि जस्ता सम्पदाहरु पनि हेर्न र घुम्न लायकका छन् । त्यसैले यो सहर आन्तरिक एवं वाह्य पर्यटकका लागि एक राम्रो गन्तव्य पनि हो । तर पूर्वाधारको अभावले यहाँको पर्यटन क्षेत्र विकासको पर्खाइमा छ ।
–यहाँको पर्यटन क्षेत्रको विकास गरी कीर्तिपुरवासीको आर्थिक उन्नति गर्न विशेष पहल गरिनेछ । पर्यटन विकासलाई ध्यानमा राखी कीर्तिपुरमा मौलिकता तथा आधुनिकतालाई संयोजन गरी होम स्टेलाई व्यवस्थित गरिनेछ ।
– चम्पादेवीलाई धार्मिक तथा प्राकृतिक पर्यटकीय गन्तव्य स्थलमा विकास गरिनेछ ।
– कीर्तिपुर नगरपालिका र चन्द्रागिरि नगरपालिको समन्वयमा निजी क्षेत्रलाई समेत सहभागी गराई मिनी बञ्जीजम्प निर्माणका लागि पहल गरिनेछ । चन्द्रागिरि तीनथानाको भिराडिल संग जोडिएको माकोचा पार्कलाई व्यवस्थित गरिनेछ ।
– कीर्तिपुरको ऐतिहासिकता, वीरता, विद्रोह तथा वलिदानको संस्कृति झल्किने विशेष पार्क निर्माण गरिनेछ ।
यो पनि पढ्नुहोस्
माओवादी केन्द्रको चुनावी घरदैलो कार्यक्रमः कार्यकर्तामा उमङ्ग र मतदाता फुरुङ्ग
