विश्वास डिसी
कोरोना संक्रमणको कारण ८ दिनदेखि अस्पतालको आइसोलेसनमा छु । कुनै लक्षण नभएपनि अस्पतालमा निश्चित समय बस्नै पर्ने रहेछ । केही सकारात्मक भावना जगाउने किताब पढिरहेको छु । अरुबेला पढ्ने समय खासै पाइन्नथ्यो । कोरोना पोजिटिभ राख्ने आइसोलेसन वार्ड भएकोले एक्लै छु । परिवारसंग फोनमा कुरा गर्छु, भिडियोमा साथीभाइसंग कुरा गर्छु । किनकी बाहिर निस्कन मिल्दैन ।
नेपालमा कोरोनाको संक्रमण बढ्दै गएपछि मैले पनि सावधानी अपनाएर काम गरिरहेको थिए ।
काठमाडौं उपत्यकाको फोहोर फालिने नुवाकोटको सिसडोलमा रहेका नागरिकलाई कुनै संक्रमण नहोस् भनेर म आँफैले काठमाडौं महानगरपालिकासँग कोरोना परीक्षण गराउन माग गरेँ । परीक्षणकै विषयले विवाद पनि भएको थियो । त्यही भएर भृकुटीमण्डपमा रहेको फोहोरमैला विभागमा छलफल गर्न म गएँ । विद्यासुन्दर शाक्यसँग पनि भेटेँ । म लामो समय बसेको भनेको भृकुटीमण्डप हो त्यो पनि स्वाव परीक्षण गराउन भनेर । मेरो मात्र होइन सिसडोलबासी केही साथीहरुको पनि परीक्षण गराउनु थियो । मेयरले परीक्षण गराउन सहमति जनाए । सबै साथीहरुको गर्दा भीड लामो भइसकेको थियो । मेरो पालामा परीक्षण गराउने सकियो भन्यो । त्यसपछि जेठ ६ गते नुवाकोट गएर मैले पीसीआर परीक्षणको लागि स्वाव दिएँ । त्यहाँ झण्डै ४० जना जतिको स्वाव संकलन गरिएको थियो । जेठ ८ गते रिपोर्ट आयो, स्वास्थ्य कर्मीले ल सबैको कोरोना नेगेटिभ आयो भनेर फोन गरे । ल राम्रो भयो भनेर प्रतिक्रिया जनाए । भोलिपल्ट त फेरि फोन आयो ल तपाईँ कहाँ हुनुहुन्छ ? तपाईमा कोरोना पोजिटिभ देखियो भन्छ । अनि मैले हिजो नेगेटिभ आएको आज कसरी पोजिटिभ भनेर प्रश्न गर्दा उत्तर नै दिएनन् ।
म संक्रमित भएको थाहा पाएपछि अस्पताल जान तयार भए । धेरै पर्खे तर एम्बुलेन्स आएन । एम्बुलेन्स नआएपछि साँझ आफैँ मोटरसाइकल चलाएर टेकु अस्पतालसम्म आए । तर पछि मलाई खोज्दै मेरो घरमा प्रहरी पुगेका रहेछन् ।
अहिले म काठमाडौंको टेकुमा रहको शुक्रराज ट्रपकल तथा सरुवा रोग अस्पतालको आइसोलेसन वार्डमा छु । वार्डमा डाक्टरहरु आउँदैनन्, फोन गरेर सोध्छन, केही भएको छ भनेर ? एकदिन स्वाव संकलन गर्न नर्स आएकी थिइन । त्यसको रिपोर्ट नेगेटिभ आएको छ ।
कोरोनाले उच्च ज्वरो आउँछ, निरन्तर खोकी लाग्छ र स्वास फेर्न अप्ठेरो हुन्छ भन्ने सुनेको हो तर, मलाई केही भएको छैन । ज्यान ठीक छ तर, रिपोर्ट मात्र विसन्चो आयो ।
कहाँबाट सर्यो कोरोना ?
मलाई कोरोना भृकुटीमण्डपबाट सरेको हुनसक्छ किनभने सबैभन्दा बढी लामो समय र केही भीडमा म त्यहाँ मात्रै बसेको हुँ । नुवाकोट जाने आउने भइरहन्छ । त्यहाँ जाँदा पनि सुरक्षित नै रहने गरेको छु । गाउँमा त्यस्तो भीड खासै हुँदैन झन् अहिलेको अवस्थामा हुने कुरै भएन ।
दोस्रो रिपोर्टको पर्खाइ
म जेठ ९ गते टेकु अस्पताल आएको हुँ । १३ गते स्वाव लिए, त्यसको रिपोर्ट १४ गते आयो र नेगेटिभ आयो ।
कोरोना पोजिटिभ देखिएको केही दिनपछि स्वाव लिने गर्दा रहेछन् । दोस्रो रिपोर्ट पनि नेगेटिभ आयो भने डिस्चार्ज गर्ने भनेका छन् । अब त्यसकै पर्खाइमा छु । दोस्रो रिपोर्ट पनि नेगेटिभ आउँछ भन्ने विश्वास छ किनभने म मा कुनै लक्षण नै छैन ।
यो पनि पढ्नुहोस
