ललितपुर । ललितपुरको महालक्ष्मी नगरपालिकाका वडा नं. ६ सिद्धिपुर, टफाखलमा एकै घरका ४ जनामा कोरोना पोजिटिभ देखिएको छ ।
शुरुमा एक निजि बैंकमा काम गर्ने एक व्यक्तिमा कोरोना पोजिटिभ देखिएपछि उनले आफ्नो नजिक रहेका श्रीमती, बुबा र आमाको पिसिआर परिक्षण गर्दा कोरोना पोजिटिभ देखिएको वडाअध्यक्ष बासुदेव महर्जनले जानकारी दिए ।
कोरोना पोजिटिभ देखिएको करिब १ हप्ता हुदा पनि स्वास्थ्य कार्यालयबाट कन्ट्राक्ट ट्रेसिङको कार्य नगर्दा स्थानीय त्रसित बनेको महर्जनले दैनिकीन्युजसँग दुखेसो पोखे ।
उनले भने, ‘सोमबार कन्ष्ट्राक्ट ट्रेसिङको काम हुन्छ भन्ने जानकारी आएको थियो । किन हो ? सोमबार स्वास्थ्य कार्यालयले गरेन ।’
कन्ष्ट्राक्ट ट्रेसिङको कार्य स्वास्थ्य कार्यालयले नगरेपछि सोमबार निजि ल्याबका मान्छेलाई बोलाएर १८ जनाले पैसा तिरेर परीक्षण गरेको उनले बताए । ‘हुनेले त गर्छ, नहुनेले के गर्ने हो ?’ उनले भने, ‘यसमा मेरो घोर आपत्ति छ ।’ यसबारे नगरपालिकाका प्रमुख रामेश्वर श्रेष्ठलाई जानकारी गराएको बताए ।
सिद्धिपुरमा १८ जनाले पैसा तिरेर परीक्षण गरेको स्वीकार गर्दै लुभु प्राथमिक स्वास्थ्य चौकीका जनस्वास्थ्य निरीक्षक टेकराज ओझाले अरु क्लोज कन्ष्ट्राक्टमा भए नभएको बुझ्ने कार्य भैरहेको बताए ।
