काठमाडौं । ललितपुरको पुल्चोकमा गएको बिहीबार रातो मच्छिन्द्रनाथको रथ तान्ने क्रममा झपड हुँदा ट्राफिक प्रहरीलाई निर्घात कुटेको आरोपमा पक्राउ परेका ६ जनालाई कोरोना पुष्टि भएको छ ।
पक्राउ परेकामध्ये ६ जनामा कोरोना भाइरस (कोभिड–१९) को संक्रमण देखिएको महानगरीय प्रहरी परिसर ललितपुरका प्रवक्ता डिएसपी सन्तोष तामाङले जानकारी दिए । १६ जनाको रिपोर्ट आएकोमा ६ जनाको पोजेटिभ आएको उनको भनाइ छ ।
‘हिरासतमा लिएर पिसिआर परीक्षण गराउँदा ६ जनामा कोरोना देखिएको छ’ तामाङले भने, ‘पक्राउ परेकालाई मुद्दा अगाडि बढाउन अदालत लैजानका लागि स्वास्थ्य परीक्षण गराउने क्रममा उनीहरुलाई कोरोना देखिएको हो।’
तामाङले भने पक्राउ परेकालाई हाँजिरी जमानीमा छोडेको बताए । 'आज आएको रिपोर्टमा ६ जनामा संक्रमण देखिएको छ, उनीहरूलाई हाँजिरी जमानीमा छोडिएको छ' तामाङले भने ।
यसअघि पुल्चोकको भीड नियन्त्रणमा खटिएकामध्ये महानगरीय प्रहरी वृत्त सातदोबाटोको प्रहरी निरीक्षकसहित १८ प्रहरीलाई पनि कोरोना देखिएको थियो।
ट्राफिक प्रहरीलाई निर्घात कुट्ने र झडपमा संलग्न भएका १९ जनालाई पक्राउ गरेर अनुसन्धान जारी राखिएको थियो ।
