भक्तपुर । भक्तपुरमा एकै घरका तीनजनाको हत्या गरिएको अवस्थामा शव फेला परेको छ । मध्यपुर थिमि नगरपालिका ९ निकोसेरामा रहेको एक घरमा एकै परिवारका ३६ वर्षीय सुदिप अधिकारी, उनकी श्रीमती ३४ वर्षीया सम्झना अधिकारी र १५ वर्षीय छोरा सुशान्त अधिकारीको शव फेला परेको महानगरीय प्रहरी वृत्त प्रमुख डीएसपी ऋषिराम कँडेलले बताए ।
घटनाको प्रकृति हेर्दा हत्या तीनैजनाको हत्या गरेको हुनसक्ने उनले बताए । सो घटनाको अध्ययन गर्न महानगरीय अपराध महाशाखाका एसएसपी दीपक थापाको टोली खटिएको छ । मृतकका भाइ सुनिल अधिकारी घरमा आइपुग्दा घरको दोश्रो तल्लामा कुकुर र सम्झना अधिकारीको शव, तेस्रो तलामा सुशान्त र माथिल्लो तलामा सुदिप अधिकारीको शव फेला परेको प्रहरीले बताएको छ ।
डिएसपी कँडेलका अनुसार हत्या केही दिन पहिले भएकोजस्तो देखिन्छ ।
