ललितपुर । जनता समाजवादी पार्टी (जसपा) को संघीय परिषद् अध्यक्षमा पुर्वप्रधानमन्त्री डाक्टर बाबुराम भट्टराई चयन भएका छन् । सो परिषद् जसपाको सबैभन्दा शक्तिशाली निकाय समेत हो । जसपाको मंगलबारको केन्द्रीय कार्यकारिणी समितिको बैठकले उनलाई संघीय परिषद् अध्यक्ष बनाउने निर्णय गरेको जसपाका नेता गंगानारायण श्रेष्ठले जानकारी दिए । केन्द्रिय समिती समेत संघीय परिषद् मातहत हुनेभएकोले शक्तिशाली निकाय बनेको हो । बैठकले संघीय परिषद्सँगै ८ सय १ सदस्यीय केन्द्रीय समितिसमेत गठन गरेको छ । त्यस्तै समग्र पार्टीको समायोजनका लागि समायोजन कार्यदल पनि गठन गरिएको श्रेष्ठले बताए । जसपाको केन्द्रिय अध्यक्षमा महन्थ ठाकुर र उपेन्द्र यादव रहेका छन् । राजेन्द्र महतोलाई वरिष्ठ नेता बनाइएको थियो भने भट्टराईको नाम पार्टी एकताका लागि निर्वाचन आयोगमा पठाएको निवेदनमा अशोक राईभन्दा पछाडि थियो । पार्टीको विधान परिमार्जन गर्ने र विधानमा आधारित नियमावलीसमेत बैठकबाट पारित गरिएको उनले बताए । जसपाको बैठकले कोभिड- १९ रोकथाम तथा नियन्त्रणमा सरकारले उदासीनता देखाएको भन्दै विरोधसमेत गरेको छ । यसैगरी बैठकले सांसद रेसम चौधरीको रिहाइको लागि अभियान चलाउने समेत निर्णय गरेको छ । थरुहट आन्दोलनका क्रममा एसएसपी सहित ८ प्रहरीको हत्या गरेको आरोप पुष्टि भएपछि चौधरीलाई डिल्लीबजार कारागार राखिएको छ ।
