काठमाडौं सवारी ज्यान मुद्दाको केस मिलाइदिने भन्दै १५ हजार रुपैयाँ घूस लिएको कसुरमा महानगरीय प्रहरी वृत्त थानकोटका निरीक्षक (इन्स्पेक्टर) गायत्रीराज शर्मा परिसर तानिएका छन् । ३ वर्षअघि मात्रै प्रहरी सेवा प्रवेश गरेका शर्मा थानकोट वृत्तको मुद्दा शाखामा कार्यरत थिए ।
यससम्बन्धमा थप अनुसन्धान भइरहेको महानगरीय प्रहरी कार्यालयले जनाएको छ ।
२६ मंसिर चन्द्रागिरि नगरपालिका–१५, ढुंगे अड्डामा प्रदेश २–०३–००१–ख १४२० नम्बरको गाडीले ठक्कर दिँदा तीन जनाको मृत्यु भएको थियो भने अन्य ६ वटा सवारी साधनमा क्षति पुगेको थियो । थानकोट वृत्तको मुद्दा शाखामा कार्यरत शर्माले यही घटनामा दुर्घटना गराउने बसका चालकलाई छुटाइदिने भन्दै घूस लिएका थिए ।
शर्माले लामो समयसम्म मुद्दा अड्काइदिएपछि उजुरी परेको थियो । त्यसपछि परिसर र महानगरीय प्रहरी कार्यालयले उनलाई निगरानीमा राखी अनुसन्धान गर्दा १५ हजार घूस लिएको पुष्टि भएको हो । त्यसपछि उनलाई निलम्बन गरी अनुसन्धान अघि बढाइएको कार्यालयले जनाएको छ ।
