काठमाडौं । विश्व स्वास्थ्य संगठनले कोरोना बिरामीलाई उपचारमा प्रयोग गर्ने एक औषधि सिफारिस गरेको छ । ‘इन्टरलेउकिन–६’ औषधिलाई कोभिड १९ विरुद्धको उपचारको लागि प्रभावकारी भएको भन्दै प्रयोग गर्न सिफारिस गरेको हो। औषधि सिकिस्त बिरामीको उपचारका लागि प्रभावकारी मानिएको छ ।
विश्व स्वास्थ्य संगठनले १० हजार बिरामीमा २७ क्लिनिकल ट्रायल गरेको थियो । कोभिड १९ ले सिकिस्त तथा गम्भीर बिरामीमा रोग प्रतिरोधी क्षमतामा अवरोध पुर्याउँछ जुन बिरामीको स्वास्थ्यका लागि घातक हो । यो औषधिले त्यो अवरोध बन्द गर्न सहयोग गर्छ । संगठनका महानिर्देशक डा. टेड्रोस एडहनम गेब्रियससले यो औषधिले एकदम सिकिस्त तथा गम्भीर बिरामीका लागि एउटा आशाको रुपमा देखिएको बताए । उनले भने, ‘सबै देशमा पर्याप्त मात्रामा खोप पुग्न सकेको छैन । जसले गर्दा कोभिडका सिकिस्त बिरामी हुने सम्भावना बढ्छ । यस्ता देशहरुमा यो औषधिहरुको आवश्यकता छ ।’
यो औषधिको सबैको पहुँच तथा सर्वसूलभ बनाउनका लागि संगठनले उत्पादनकर्तालाई मूल्य घटाउन र गरिब देशहरुमा उपलब्ध गराउन अनुरोध गरेको छ ।
